Spanja është kampione e botës për herë të dytë në histori, goli i Ferran Torres zbret nga froni Argjentinën! U deshën 120 minuta për fituesin e Botërorit 2026

FT/ Spanjë 1-0 Argjentinë (Ferran Torres 106')

SHBA - Goli i Ferran Torres në minutën e 106-të i dha fitoren 1-0 kombëtares së Spanjës kundër Argjentinës në finalen e Kupës së Botës 2026 që u zhvillua të dielën e 19 korrikut në stadiumin 'MetLife' në New Jersey. 'Iberikët' dominuan në 120 minuta skuadrën që deri përpara këtij dueli mbante trofeun e kampionit, duke zbritur nga froni ekipin e Lionel Scalonit.

Pas 16 vitesh pritje, Spanja rikthehet te titulli kampion i Kupës së Botës për herë të dytë në histori, ndërsa Argjentina do duhet të kënaqet me medaljen e argjendtë edhe sepse 30 minutat e shtesës i luajti me një lojtar më pak pas daljes me karton të kuq të Enzo Fernandez. Veç këtij momenti, 'Albiceleste' duhet të harrojë këtë duel në të cilin për 120 minuta nuk goditën asnjëherë portën edhe pse në fushë ishte Lionel Messi. Në fund nuk mungoi tensioni mes Gavit dhe Paredes.

Kështu, pasi triumfit në Evropianin 2024, Spanja me trajnerin Luis de la Fuente merr edhe trofeun e Botërorit 2026 duke konfirmuar se janë dominues në këtë sport. Spanja ka 38 ndeshje radhazi pa humbje. Sa i takon golashënuesit më të mirë të turneut i cili u zhvillua për 39 ditë në SHBA, Meksikë dhe Kanada, 'Këpuca e Artë' i shkoi sulmuesit të Francës, Kylian Mbappe, me dhjetë gola, duke lënë pas Lionel Messin me tetë gola. Historike edhe për Lamine Yamal, me sulmuesin e Spanjës që në moshën 19-vjeçare ka fituar Kampionatin Evropian dhe Kupën e Botës. Spanja këtë Botëror pësoi vetëm një gol, atë kundër Belgjikës.

Me ngritjen e trofeut nga kapiteni i Spanjës, Rodrigo, mbyllet edhe turneu i 23-të i Kupës së Botës. Trofeu i këtij edicioni për kapitenin e kampionëve të rinj të botës u dha nga presidenti i SHBA-së, Donald Trump, me këtë të fundit që e ndoqi ndeshjen në stadium krah kreut të FIFA-s, Infantino.

Çmimet e këtij Botërori:

Topi i Artë i këtij turneu, ose lojtari më i mirë u fitua nga Rodrigo, kapiteni i Spanjës

'Këpuca e Artë', golashënuesi më i mirë - Kylian Mbappe (Francë) me dhjetë gola

Pau Cubarsi, mbrojtësi i Spanjës shpallet lojtari i ri më i mirë

Unai Simon, portieri i Spanjës merr 'Dorezën e Artë'

Komentet më të rëndësishme të sfidës:

120+5' Mbyllet 1-0 ndeshja, Spanja është kampione e botës për herë të dytë në histori.

120' Pesë minuta shtesë. Argjentina rrezikon me tre raste, por nuk shënon dot me Senesi.

113' Ferran Torres shënon golin e dytë për Spanjën, por gjithçka anulohet për pozicion jashtë loje.

106' GOOL! Ferran Torres kalon Spanjën në epërsi. Nico Williams asiston për sulmuesin e Barcelonës që me të majtën mposht Martinezin.

106' Nis shtesa e dytë prej 15 minutash.

105+3' Mbyllet 0-0 shtesa e parë prej 15 minutash.

103' Nuk i besojnë syve te Spanja. Merino provon me kokë pas krosimit nga e majta, por sheh topin të shkojë ngjitur me shtyllën.

97' Nico Williams shënon, por arbitri Vincic e anulon për një faull më herët. Rast i diskutueshëm që pritet të krijojë debat.

91' Nis shtesa e parë prej 15 minutash. 

90+8' Mbyllet 0-0 koha e rregullt, finalja e Botërorit do të luajë edhe dy pjesë nga 15 minuta. Argjentina nuk ka bërë asnjë gjuajtje në 90 minuta.

90+7' Lamine Yamal provon nga goditja e dënimit, Martinez devijon në këndore.

90+2' Ndërhyrje e gabuar nga Enzo Fernandez, mesfushori i Argjentinës del me karton të kuq pas dy të verdhëve (edhe pas kontrollit në VAR). Argjentina po i drejtohet shtesave me dhjetë futbollistë, tension edhe mes dy stafeve.

90' Katër minuta shtesë.

83' Enzo Fernandez i Argjentinës merr karton të verdhë.

75' Mikel Merino dhe Nico Williams në fushë për Spanjën, jashtë Dani Olmo dhe Alex Baena.

70' Scaloni bën dy lëvizje, del i dëmtuar Romero, në vend të tij Medina. Jashtë de Paul, në fushë Giuliano Simeone.

67' Yamal kroson për Torres që godet me kokë, pret Martinez në pozicion.

64' Gjuajtje e fortë nga Olmo, i pasigurt portieri Martinez që e dërgon topin në këndore. Me fat Argjentina.

62' Luis de la Fuente bën dy lëvizje te Spanja. Jashtë Ruiz e Oyarzabal, në fushë yjet e Barcelonës Pedri dhe Ferran Torres.

58' Argjentina largon Montiel, në vend të tij Molina.

52' Paredes ndëshkohet me karton të verdhë pas vetëm shtatë minutave në fushë.

46' Nis pjesa e dytë. Në fushë për Argjentinën futet Paredes, Gonzalez mbetet në dhomat e zhveshjes.

45+4' Mbyllet 0-0 pjesa e parë.

45' Katër minuta shtesë.

44' Zëvendësim i detyruar për Argjentinën, del Lisandro Martinez i dëmtuar dhe futet Nicolas Otamendi.

43' Cucurella provon nga jashtë zone për Spanjën, sfera del jashtë.

41' Lisandro Martinez (Argjentina) ndëshkohet me kartonin e parë të verdhë në këtë ndeshje.

39' Mikel Oyarzabal provon nga jashtë zone me të majtën, pret Martinez.

17' Provon me një top të gjatë de Paul, por Nico Gonzalez nuk e kontrollon dot në zonë.

12' Vjen goditja e parë nga këndi. Kroson Ruiz, por Lisandro Martinez devijon sërish në këndore.

6' Përgjigjet Lionel Messi, del Simon dhe largon topin me këmbë.

5' Lamine Yamal ka shansin e parë për Spanjën, ndalet nga Martinez.

1' Fërshëllen arbitri Slavko Vincic. Nis ndeshja me topin e parë të shkelmuar nga Leo Messi. 

Formacionet zyrtare:

Spanja (4-2-3-1): Simon; Cucurella, Laporte, Cubarsi, Porro; Ruiz, Rodri; Baena, Olmo, Yamal; Oyarzabal Trajner: Luis de la Fuente

Argjentina (4-4-2): Dibu Martinez; Montiel, Romero, Li.Martinez, Tagliafico; de Paul, Nico Gonzalez, Mac Allister, Enzo Fernandez; Alvarez, Messi Trajner: Lionel Scaloni

Për të lexuar lajme të tjera nga Botërori KLIKONI KËTU.

Për të parë rezultatet e ndeshjeve të Botërorit KLIKONI KËTU.

Rendit zhvillimet sipas orarit:

Të Fundit Të Parat