Shqipëria fatkeqësisht nuk u kualifikua në kampionatin botëror, por në Brazil do të shkojnë të paktën 10 futbollistë shqiptarë në 5 përfaqësuese të ndryshme. Trajnerët e Gjermanisë, Zvicrës dhe Belgjikës kanë shpallur listat paraprake, teksa të njëjtën gjë pritet që të bëjnë edhe Kroacia me Greqinë. Në ekipet e shteteve të lartpërmendura ndodhen edhe futbollistë me origjinë shqiptare duke formuar një formacion pothuajse të plotë. Numri më i madh i shqiptarëve do të udhëtojë me përfaqësuesen e Zvicrës.

Trajneri Hizfeld shpalli dje listën paraprake duke konfirmuar Shaqirin, Xhakën, Behramin, Xhemailin dhe Mehmedin, plot 5 futbollistë me origjinë shqiptare nga Kosova dhe Maqedonia. Hizfeld nuk vendosi që të grumbullonte shqiptarin tjetër Pajtim Kasami për shkak se nuk e bindi me rezultatet në edicionin e fundit. Por, megjithatë Shaqiri- Xhaka- Berhami- Xhemaili- Mehmedi kanë krijuar identitetin e tyre duke qenë boshti i ekipit ‘helvet’.

Pas Zvicrës edhe trajneri i Gjermanisë duket se po bën realitet ëndrrën e mbrojtësit me origjinë shqiptare për të veshur fanellën e legjendës, pasi e ka thirrur në listën paraprake. Shkodran Mustafi që luan me Sampdorian është në qendër të vëmendjes edhe nga shumë klube italiane dhe gjermane. Adnan Januzaj është një tjetër futbollist me origjinë shqiptare që është grumbulluar për në Brazil me përfaqësuesen e Belgjikës.

Trajneri Viltmos pavarësisht se rrezikon përçarjen e grupit ka grumbulluar shqiptarin e Istogut që luan me United. Ndërkohë dilemat janë shuar edhe për Greqinë, me të cilën do të udhëtojnë në Brazil 2 shqiptarë. Në listën e trajnerit helen janë Sotir Nini dhe Gjergji Kone, dy shqiptarë. E ndërsa Nini e ka pranuar origjinën nga Himara, Kone nuk pranon kurrsesi një gjë të tillë. I fundit shqiptar që diskutohet për pjesëmarrjen në Brazil është Arjan Ademi që luan në Kroaci dhe është grumbulluar 3 herë me ekipin e parë pas paraqitjes së mirë me të gjitha nivelet e moshave.