KANADA - Çmimi i Madh i Kanadasë në Formula 1 u fitua nga piloti italian i Mercedesit, Andrea Kimi Antonelli. 19-vjeçari siguroi fitoren e katërt radhazi këtë sezon, teksa e gjithë bota e shpejtësisë është duke folur për cilësitë e tij.

Pas një fundjave shumë të mirë për George Russell, i cili fitoi garën Sprint dhe më pas siguroi 'pole position', anglezi dominoi garën deri në xhiron e 30-të, kur më pas një problem në makinë bëri që të dilte jashtë piste i tërbuar.

Deri në këtë moment të garës dyshja e Mercedes, Russell dhe Antonelli, dhuruan emocione të forta me parakalime të ndërsjellta. Pas xhiros së 30-të i riu italian siguroi kreun duke mos e lëshuar deri në valëvitjen e flamurit me kuadrata.

Në vendin e dytë u rendit Lewis Hamilton, shtatë herë kampioni i botës që ia doli të siguronte rezultatin më të mirë me Ferrarin në sezonin e dytë me 'Kokëkuqen'. Hamilton qëndroi gjatë pas Max Verstappen (katër herë kampio bote me Red Bull), por shtatë xhiro nga fundi ndodhi parakalimi që e la në vendin e dytë, ndërsa holandezi përfundoi i treti.

Charles Leclerc me Ferrarin e mbylli në vendin e katërt, duke lënë pas Hadjar, Colapinto, Lawson, Gasly, Sainz dhe Bearman. Lando Norris (McLaren), kampioni në fuqi i botës, nuk mundi ta mbyllte garën për një problem në kutinë e shpejtësisë në xhiron e 40-të. Edhe Perez, Russell, Alonso dhe Albon nuk e mbyllën garimin.

Gara e radhës në Formula 1 është fundjavën e 5-7 qershorit në cirkuitin qytetas të Monacos, aty ku ai që fiton 'pole' do ta ketë shumë më të lehtë për të mbajtur vendin e parë.

Pas garës së Kanadasë, italiani Antonelli kryeson me 131 pikë, 43 më shumë se shoku i skuadrës, Russell (88). Pas tyre vjen Leclerc me 75 pikë, ndjekur nga shoku i skuadrës te Ferrari, Hamilton me vetëm tre pikë më pak.

Për Ndërtuesit, Mercedes dominon me 219 pikë, duke lënë pas Ferrarin me 147 pikë dhe McLaren me 106 pikë.