Frikë për vullkane, gjendje e jashtëzakonshme në Islandë! 800 tërmete në 24 orë në qytetin Grindavik

Mbi 800 tërmete të rëna gjatë natës shtuan frikën për shpërthime vullkanike në Islandë, ku autoriteti i Mbrojtjes Civile shpalli gjendjen e jashtëzakonshme.

Planet e evakuimit janë vënë në zbatim për qytetin e Grindavik, me popullsi rreth 4,000 banorësh, tre kilometra në jug-perëndim të zonës ku u regjistruan lëkundjet sizmike të premten. Të enjten, 'Laguna Blu', një zonë turistike pranë Grindavikut, e njohur për llixhat e saj termale, u mbyll si masë paraprake. Islanda ka 33 sisteme vullkanike aktive, numri më i lartë në Evropë dhe mijëra lëkundje janë regjistruar që nga fundi i tetorit.

Herët në mbrëmjen e së premtes dy tërmete, më i forti prej të cilëve ishte me magnitudë 5.2 rihter, u ndjenë deri në kryeqytetin Reykjavik dhe përgjatë një pjese të madhe të bregdetit jugor të vendit.

“Në këtë fazë, nuk është e mundur të përcaktohet saktësisht se kur dhe ku magma mund të arrijë në sipërfaqe. Ka të dhëna se një sasi e konsiderueshme magmë po lëviz në veri drejt Grindavíkut”, thuhet në një deklaratë.

Rreth 24,000 lëkundje janë regjistruar në gadishull që nga fundi i tetorit, 800 prej të cilave vetëm gjatë 24 orëve të fundit.

M.T/r.k./Shqiptarja.com

TAG:
• islande
• Holande
• termet
• gjendje e jashtezakonshme
• vullkan