‘Fundoset’ Unaza e Burrelit! 960 metra rreth 1.3 mln €! Banorët ngrenë supet: Këtu toka rrëshqet nga 2010-a (Por përse investon ARRSH?)

Ndryshe nga rruga në Librazhd, shembja e së cilës ka lënë në izolim prej gati 1 jave juglindjen e vendit, në Burrel, 960 m rrugë, e ndërtuar si unazë për të shmangur trafikun e qytetit, është shkatërruar prej muajit janar të këtij viti, dhe deri më tani nuk ka asnjë ndërhyrje. Banorët tregojnë se kjo rrugë prej më shumë se 1 dekade ka pasur rrëshqitje të vazhdueshme të dherave dhe ngrenë supet se përse ARRSH investoi rreth 1.3 mln € për ta asfaltuar atë, kur edhe sot, është sërish e shembur dhe e bllokuar.

***

Moti i keq që preku vendin në fillim të vitit, shembi edhe këtë segment rruge më 9 janar.

Dielli ka dalë prej kohësh, por edhe pas më shumë se 1 muaji e gjysmë, sot, Unaza e Burrelit, jo vetëm që nuk është hapur, por është shkatërruar edhe më shumë.

Unaza e ndërtuar gjatë vitit 2025, vetëm 960 metra e gjatë, do të shërbente për të lehtësuar trafikun në qytet. Pra, kushdo që vjen nga Klosi, apo Shkopeti, nuk do të kalonte mes përmes qytetit, por nga kjo unazë poshtë tij.

Kjo rrugë e shkurtër, ka pësuar çarje dhe shembje të asfaltit në 3 vende, duke e bërë të pakalueshme si për këmbësoret ashtu edhe automjetet.

Në fakt banorët, të cilët i kanë shtëpitë poshtë rrugës, nuk janë të surprizuar. Prej vitit 2010, thonë se kjo rrugë ka pasur rrëshqitje të vazhdueshme të dherave.

“Kjo përherë ka qenë shemb. Rrezikon banesa se ka shtëpi matanë dhe shumë njerëz kanë ikur prej këtej, i kanë lënë shtëpitë dhe kanë dalë në qytet, se u shembte shpesh kjo rrugë”, thotë një banor.

“Ka qenë me probleme dhe më parë, firma e ndërtoi e bëri me ndriçim, me trotuar, me të gjitha, bëri shi dhe e ka çuar në këtë gjendje. Rruga ka pas rrëshqitje dhe më parë, ka pas gjithmonë rrëshqitje”,  thotë një tjetër banor.

“Shumë probleme, na vjen ujti, mu ka shemb oborri, siç shembet oborri shembet dhe shtëpia. Na kanë marrë letrat, thonë se i kanë çuar në Tiranë. Sado që shtëpinë e kam bërë të mirë, tokës nuk i besohet”, thekson një banore e zonës.

Rreziqet e kësaj toke, banorët i kanë ditur, por studiuesit duket se i kanë shpërfillur.

Autoriteti Rrugor Shqiptar, për këto 960 metra rrugë investoi rreth 1.3 milionë euro, ndërsa projekti u realizua nga Ulza” sh.p.k.  Zona ka pasur precedentë rrëshqitjeje të dokumentuar me vendime dëmshpërblimi ndër vite nga Këshilli Bashkiak. Aktualisht ky objekt mbetet i pa kolauduar dhe i pa marrë në dorëzim, çka pritet të kërkojë tjetër financim nga autoritetet për të riparuar dëmtimet.

 

G.M./A.M/Shqiptarja.com

TAG:
• Diber
• rruge
• burrel
• unaza e burrelit
• shembet rruga