UASHINGTON – Ekipi elektoral i presidentit Joe Biden do të shpenzojë 50 milionë dollarë deri në fund të qershorit, me reklama televizive ku përfshihet dënimi për vepra penale i ish-presidentit Donald Trump. Kjo fushatë reklamash sinjalizon se presidenti demokrat do të synojë t’u kushtojë më shumë rëndësi sfidave ligjore të rivalit të tij republikan, ndërsa afrojnë zgjedhjet e nëntorit.
Ekipi elektoral i presidentit Biden tha të hënën se synon të shpalosë qartë dallimet mes dy kandidatëve, përpara debatit të tyre të parë publik që mbahet më 27 qershor në Atlanta.
Fushata përmban reklama që synojnë të fitojnë mbështetjen e votuesve afrikano-amerikanë, hispanikë dhe aziatiko-amerikanë, si dhe një vëmendje të veçantë për shpalljen fajtor të ish-presidentit Trump për 34 akuza penale në gjyqin në Nju Jork. Reklamat do të jepen në kanalet e përgjithshme televizive, ato kabllore, si dhe në platformat nëpërmjet internetit dhe atyre celulare në shtetet kryesore për betejën elektorale.
Krahas shpalljes fajtor të ish-presidentit Trump në gjyqin penal në Nju Jork, reklama e titulluar “Karakteri ka rëndësi” vë në dukje edhe se ai është shpallur fajtor për ngacmim seksual dhe mashtrim financiar në procese të tjera gjyqësore. Ish-presidenti Trump përballet me akuza të mëtejshme penale në tre procese të tjera gjyqësore, që nuk kanë gjasa të zhvillohen përpara zgjedhjeve të nëntorit.
“Në sallën e gjyqit, shohim Donald Trump-in real”, thuhet me zë përshkrues gjatë reklamës. Paraqiten në vazhdim fotografitë e ish-presidentit Trump gjatë regjistrimit në burgun e Xhorxhias, si dhe të presidentit Biden duke u përshëndetur me votuesit. “Këto zgjedhje janë mes një të dënuari për vepra penale që ka dalë vetëm për veten e tij dhe një presidenti që lufton për familjen tuaj”.
Presidenti Biden ka folur gjithashtu shpesh për shpalljen fajtor të ish-presidentit Trump dhe e ka kritikuar kur ai ka thënë se vendimi ka qenë i motivuar politikisht. Presidenti Biden thotë se “është e rrezikshme, e papërgjegjshme që dikush të thotë se u manipulua, vetëm sepse nuk i pëlqeu vendimi”.
Djali i presidentit Biden, Hunter Biden, u shpall fajtor në Dellauer për tre akuza penale në lidhje me blerjen e një pistolete në vitin 2018, për të cilën prokurorët thanë se gënjeu në formularët federalë duke deklaruar se nuk ishte përdorues droge. Presidenti ka thënë se do ta pranojë rezultatin dhe se “do të vazhdojë të respektojë procesin gjyqësorin ndërsa Hunter-i shqyrton mundësinë e apelimit”.
Një element qendror i strategjisë për rizgjedhje të presidentit Biden është vënia në dukje e politikave të propozuara nga ish-presidenti Trump për një mandat të dytë, duke mobilizuar kështu demokratët dhe votuesit e pavarur. Megjithatë, një fushatë reklamash që thekson dënimin e ish-presidentit Trump në një shkallë të tillë masive, sinjalizon për përpjekjet e rigjallëruara për t’i bërë çështje zgjedhore sfidat ligjore të ish-presidentit Trump – një strategji kjo për të cilën kishte nguruar deri më tani ekipi elektoral i presidentit Biden.
“Është një kontrast i thellë dhe që ka rëndësi të madhe për popullin amerikan”, tha zëdhënësi i fushatës elektorale të presidentit Biden, Michael Taylor. “Dhe kjo është arsyeja përse duhet të sigurohemi që çdo ditë t’u kujtojmë votuesve se Joe Biden-i po lufton për ta, ndërsa Donald Trump-i po bën një fushatë të fokusuar tek një person i vetëm: vetja e tij”.
Ish-presidenti Trump ka mohuar të ketë bërë ndonjë shkelje dhe thotë, pa ndonjë evidencë, se presidenti Biden apo zyrtarë të Departamentit të Drejtësisë orkestruan për arsye politike procesin gjyqësor ndaj tij në Nju Jork. Ish-presidenti dhe aleatët e tij kanë ngritur mundësinë e kundërpërgjigjes me procese hetimore ndaj kundërshtarëve politikë kur ai të rikthehet në Shtëpinë e Bardhë.
Zëdhënësja e fushatës elektorale të ish-presidentit Trump, Karoline Leavitt tha se administrata e presidentit Biden “po përdor politikisht sistemin gjyqësor ndaj ish-presidentit Trump” dhe se kontrasti mes tij dhe presidentit Biden “do të jetë shumë i qartë në skenën e debatit”./ VOA
Lajme të tjera
-
Dyndje për festat! 'Bien' linjat ajrore amerikane, bllokohen mijëra fluturime
25 Dhjetor, 15:55 -
Një mrekulli Krishtlindjesh! Mendonte se ishte fëmijë i vetëm, 75-vjeçari takohet për herë të parë me vëllezërit dhe motrën
25 Dhjetor, 15:44 -
Perëndimi: Vendimet e Parlamentit të Republikës Srpska kërcënojnë rendin kushtetues të Bosnjës
25 Dhjetor, 15:03 -
Trump do të blejë Grenlandën, Danimarka rrit shpenzimet për mbrojtjen e ishullit
25 Dhjetor, 14:06 -
Kërcimi viral i Donald Trump për Krishtlindje (VIDEO)
25 Dhjetor, 13:29 -
Rama në darkën me ambasadorët për festat e fundvitit: Shqipëria nuk ka plan B, vetëm anëtarësimin në BE! Presidenti i ri i SHBA-ve sjell mundësi të reja
24 Dhjetor, 18:26 -
Amerika po planifikon të tërhiqet nga Organizata Botërore e Shëndetësisë
24 Dhjetor, 14:47 -
SHBA/ Komisioni i Etikës akuzon ish-ligjvënësin e Floridas, Matt Gaetz se pagoi rregullisht për seks, përfshirë një minorene
24 Dhjetor, 14:45 -
Trump tha se do të blejë Groenlandën, kryeministri i vendit i përgjigjet: Nuk jemi në shitje
24 Dhjetor, 14:16 -
Mori çantën e shpinës me dhurata në stacionin e trenit, Parashqevi Simaku i bëri kërkesë gazetares: A mund të më gjeni vajzën që e ka bërë këtë
24 Dhjetor, 12:59 -
Lista serbe jashtë zgjedhjeve, ndërkombëtarët: Veprim politik! Vuçiç: Kurti po eleminon të vetmin kundërshtar
24 Dhjetor, 12:16
-
Elon Musk: Inteligjenca Artificiale do të tejkalojë zgjuarsinë e njerëzve brenda vitit 2030
24 Dhjetor, 09:15
