Gallatasaraj fitoi titullin kampion në Turqi për herë të 18-të pas një barazimi 0-0 në fushën e rivalëve historikë të Fenerbahçes ndërsa tifozët vendas u përplasën me policinë pas përfundimit të ndeshjes.

Në një derbi shumë të nervozuar, Fenerbahçe kishte nevojë të fitonte ndeshjen për të marrë titullin kampion, por Gallatasaraj i rezistoi me mbrojtje ofensivës kundërshtare, ndërsa kartonët e kuq bënë që të dy ekipet të mbyllnin takimin me 10 lojtarë. Skuadra e Fatih Terim arriti të mbante vendin e parë me 1 pikë diferencë ndaj Fenerbahçes, ndërsa Trabzonspor u rendit i treti dhe Beshiktash i katërti.

Por kaosi mbretëroi në qytetin e Stambollit pas përfundimit të ndeshjes, pasi tifozët e Fenerbahçes hynë në fushë dhe u përleshën me policinë. Spektatorët thyen stolat e stadiumit dhe i hodhën ato në fushë, ndërsa filloi një përleshje e përgjakshme mes tyre dhe forcave të rendit, që fillimisht u detyruan të zmbrapseshin nga tërbimi i turmës.

Jashtë stadiumit, policia u detyrua të përdorte gaz lotsjellës dhe makinat me ujë për të shpërndarë tifozët të cilët thyen dhe plaçkitën dyqanet rreth e rrotull, duke i vënë flakën disa prej tyre, me përplasjet dhe dhunën që vazhduan deri në orët e para të mëngjesit.(rb/shqiptarja.com)