Ligjvënësi republikan, Brian Fitzpatrick, synon ta shtyjë Dhomën e Përfaqësuesve të votojë për një projektligj që e ndalon blerjen e naftës ruse, duke sfiduar vendimin e presidentit Donald Trump për t’i lehtësuar kufizimet ndaj eksporteve ruse të naftës.

Ligjvënësit paralajmërojnë se vendimi i Trumpit mund të ndihmojë në financimin e luftës së Moskës kundër Ukrainës.

Fitzpatrick, bashkëkryesues i Grupit të Dhomës së Përfaqësuesve për Ukrainën, njoftoi më 10 tetor se do ta paraqesë projektligjin “Ronald Reagan: Paqe përmes Forcës”.

“Do të paraqesim një projektligj dypartiak për ta bllokuar çdo blerje të naftës ruse”, shkroi Fitzpatrick në platformën X. “Do ta çojmë me detyrim në seancë plenare përmes një peticioni dhe do të miratohet me shumicë dërrmuese”.

Ligjvënësi Don Bacon është pajtuar të jetë bashkësponsor i projektligjit. Deri më tani, nuk është identifikuar ndonjë ligjvënës demokrat për sponsorizimin e tij.

Peticioni për ta nxjerrë një projektligj nga komisioni përkatës mund ta detyrojë Dhomën e Përfaqësuesve të votojë për të, pa miratimin e komisionit apo të udhëheqjes së Dhomës, nëse sigurohen 218 nënshkrime.

Nisma përballet me kufizime kohore: Kongresi nuk pritet t'i rifillojë votimet për disa javë, ndërsa mandati i tanishëm i tij përfundon në janar. Projektligj do të duhej të miratohej edhe nga Senati dhe mund të hasë në kundërshtimin e Shtëpisë së Bardhë.

Fitzpatrick iu referua qasjes së ish-presidentit Ronald Reagan ndaj Moskës dhe rikonfirmoi mbështetjen e Kongresit për presidentin ukrainas, Volodymyr Zelensky, të cilin Trump e ka kritikuar sërish.

“Rusia e pushtoi Ukrainën në mënyrë të paligjshme. Faji është tërësisht i Rusisë”, shkroi Fitzpatrick, duke shtuar se Kongresi dhe populli amerikan qëndrojnë në krah të Zelenskyt “derisa të arrihet fitorja e Ukrainës”.

Republikanët vënë në pikëpyetje lehtësimin e sanksioneve

Projektligji i propozuar pasqyron shqetësimin e disa republikanëve se lehtësimi i kufizimeve ndaj energjisë ruse mund ta dobësojë trysninë ndaj presidentit rus, Vladimir Putin.

Ligjvënësi Michael McCaul paralajmëroi se heqja e sanksioneve mund të “financojë makinerinë e luftës së Kremlinit, duke nxitur më shumë dhunë dhe shkatërrim”.

Ai iu referua ligjit “Lindsey O. Graham për vendosjen e sanksioneve ndaj Rusisë dhe Iranit”, të cilin Trump e nënshkroi në shtator.

Ky ligj e autorizon presidentin amerikan që, në kushte të përcaktuara, të vendosë tarifa deri në 100 për qind ndaj blerësve të mëdhenj të energjisë ruse. Sipas McCaulit, ligji i dha Trumpit një mjet trysnie ndaj Rusisë dhe Kinës për të ndihmuar në arritjen e një marrëveshjeje për përfundimin e luftës.

Edhe senatorja Lisa Murkowski i bëri thirrje Trumpit që t'i përdorë këto kompetenca, në vend që t'ia mundësojë Rusisë të fitojë më shumë nga eksportet e naftës.

“Mund të diskutojmë për rikthimin e Rusisë në tregjet globale të energjisë pasi të përfundojë lufta, por ndërkohë duhet të ndërpresim gjithçka që e financon atë”, shkroi ajo në rrjetet sociale.

Demokratët i referohen ndalesës për naftën ruse

Demokratët dhe ish-zyrtarët kanë theksuar ligjin e vitit 2022 “Për Përfundimin e Importit të Naftës Ruse”, i cili ndalon importin e naftës ruse në Shtetet e Bashkuara, përveç rasteve kur presidenti vërteton se Rusia i ka përmbushur disa kushte të përcaktuara. Këto përfshijnë tërheqjen nga Ukraina, njohjen e sovranitetit të saj dhe garantimin se Rusia nuk përbën kërcënim për NATO-n.

Ligji u miratua në Senat me 100 vota për dhe asnjë kundër, ndërsa në Dhomën e Përfaqësuesve i mori 413 vota për dhe nëntë kundër, pasi Rusia nisi pushtimin në shkallë të plotë të Ukrainës në shkurt të vitit 2022.

Ish-ligjvënësi Tom Malinowski, i cili më parë ka mbajtur edhe një post të lartë në Departamentin amerikan të Shtetit, u bëri thirrje udhëheqësve demokratë që t'i përdorin procedurat e përshpejtuara të këtij ligji për ta kundërshtuar vendimin e administratës.

“Sipas këtij ligji, udhëheqësit demokratë të Dhomës së Përfaqësuesve dhe Senatit mund të paraqesin një ‘rezolutë të përbashkët kundërshtimi’ për të parandaluar blerjen e naftës ruse. Më pas, Kongresi duhet të votojë për të përmes një procedure të përshpejtuar”, shkroi Malinowski në rrjetet sociale.

“Schumer dhe Jeffries duhet ta bëjnë këtë sa më shpejt të jetë e mundur”, shtoi ai, duke iu referuar Chuck Schumerit, udhëheqësit të demokratëve në Senat, dhe Hakeem Jeffriesit, udhëheqësit të demokratëve në Dhomën e Përfaqësuesve.

Se a do të zbatohet apo jo ligji i vitit 2022 edhe për marrëveshjen e fundit, kjo mbetet për t’u parë.

Paralajmërime për dëmtimin e regjimit të sanksioneve

Daniel Balson, drejtor për avokim në organizatën Razom for Ukraine, i tha Radios Evropa e Lirë se vendimi i Trumpit e minon qëllimin e legjislacionit për sanksionet, të miratuar vetëm disa javë më parë.

“Tri javë më parë, Kongresi miratoi ligjin ‘Lindsey Graham për Vendosjen e Sanksioneve ndaj Rusisë dhe Iranit’. Ky ligj synonte t'i detyronte vendet e tjera të ulnin varësinë e tyre nga energjia ruse. Vendimi i fundit i presidentit Trump thjesht e rriti varësinë tonë”, tha Balson.

Ai u bëri thirrje ligjvënësve ta kundërshtojnë këtë vendim, për ta mbrojtur Ukrainën dhe besueshmërinë e veprimeve të Kongresit. Ndonëse nuk e kishte parë projektligjin e Fitzpatrickut, Balson tha se mbështetësit e Ukrainës do të përdorin “çdo rrugë të mundshme ligjvënëse” për ta kundërshtuar vendimin.

Senatori Angus King, i cili zakonisht voton në një linjë me demokratët, tha në një deklaratë se marrëveshja do t'u sillte pak lehtësim konsumatorëve amerikanë, ndërsa do t'i sillte përfitime Rusisë.

Duke iu referuar shifrave të administratës, King tha se marrëveshja përfshinte 300.000 tonë naftë dizel për tetorin dhe 500.000 tonë për nëntorin. Kjo sasi është afërsisht e barabartë me konsumin njëditor të naftës dizel në Shtetet e Bashkuara.

“Kjo e ashtuquajtur marrëveshje me Rusinë do t'i sjellë pak përfitime Amerikës, por shumë Vladimir Putinit, teksa ai përpiqet të vazhdojë fushatën e tij vrastare kundër Ukrainës”, tha King. Ai e cilësoi marrëveshjen si “mashtrim”.

Trump sërish kërkon zëvendësimin e Zelenskyt

Më 10 tetor, Trump i përtëriu kritikat ndaj Zelenskyt, duke thënë se Ukraina duhet të mbajë zgjedhje dhe ta zëvendësojë presidentin me një udhëheqës të gatshëm të arrijë marrëveshje me Rusinë.

“Epo, mendoj se ai duhet të mbajë zgjedhje. Dhe mund ta kishte zgjidhur këtë çështje shumë herë”, u tha Trump gazetarëve.

Më herët, Trump kishte thënë se Ukraina duhet ta “gjejë një udhëheqës të ri, i cili mund të arrijë marrëveshje”. Ai gjithashtu kërkoi që Kievi “t’i ndalojë njëherë e mirë” sulmet ndaj rafinerive ruse të naftës, të cilat Ukraina i ka shënjestruar për të penguar ekonominë e luftës së Moskës dhe furnizimet me karburant.

Trump e fajësoi Zelenskyn për dështimin në arritjen e një marrëveshjeje për t'i dhënë fund luftës. Ky pretendim bie ndesh me qëndrimin e Kievit se çdo marrëveshje duhet ta mbrojë sovranitetin e Ukrainës, si dhe me thirrjet e ligjvënësve për të ruajtur presionin ndaj Moskës.

Trump gjithashtu e paraqiti Putinin si të etur për paqe dhe e përshëndeti kthimin e naftës ruse në tregjet globale.

“Kjo duket vërtet keq. Presidenti ka pasur gjithmonë një verbëri morale kur bëhet fjalë për Putinin. Mbështetja e ekonomisë ruse të luftës është e tmerrshme”, i tha Bacon Radios Evropa e Lirë.

Deklaratat e Trumpit erdhën disa orë pasi sulmet ruse vranë të paktën 20 persona në qytetin ukrainas të Zaporizhjas, në juglindje të vendit.

Zelensky ka thënë se zgjedhjet nuk mund të mbahen gjatë gjendjes së luftës dhe në kushtet e rreziqeve të sigurisë të krijuara nga pushtimi rus.

Zyrtarët ukrainas kanë përmendur gjithashtu nevojën për të garantuar që ushtarët dhe qytetarët e zhvendosur nga lufta të mund të marrin pjesë në votim të mirëfilltë.

Ministri i Jashtëm i Ukrainës, Andriy Sybiha, publikoi një deklaratë në mbrëmjen e 10 tetorit, duke shprehur mbështetjen për presidentin ukrainas.

Zyrtarët evropianë e kritikuan marrëveshjen për naftën dizel, duke paralajmëruar se të ardhurat shtesë nga energjia ruse mund ta ndihmojnë Moskën ta vazhdojë luftën.

Shefja e politikës së jashtme të Bashkimit Evropian, Kaja Kallas, tha se sulmet ruse kanë vrarë më shumë se 80 civilë ukrainas gjatë dy ditëve të fundit. Ajo shtoi se Moska ka intensifikuar sulmet hibride kundër shteteve anëtare të BE-së dhe aleatëve të NATO-s.

“Ky nuk është momenti për ta zbutur presionin ndaj Rusisë, dhe Evropa nuk do ta bëjë këtë”, tha Kallas, duke shtuar se ministrat e Jashtëm të BE-së planifikonin të shpallnin më 12 tetor një paketë të re të madhe sanksionesh, që do të synonte individë dhe organizata që mbështesin përpjekjet luftarake të Moskës./REL