Gazmend Leka në pragun e
“Symbolon”, kapriçot e pikturës

TIRANE- Ka rikrijuar Symbolonin në një koleksion pikturash. Ekspozitën e tij që qëndron e hapur në Galerinë Kombëtare, Gazmend Leka, e ka çelur falë nxitjes së Ardian Isufit dhe interesimit të koleksionistit të tij Aleksandër Josifi. Drejtori i Galerisë Kombëtare të Arteve, Artan Shabani “i dha vulën” përfundimtare dhe tashmë “Symbolon” është një nga ekspozitat më të vizituara aktualisht në Galerinë Kombëtare. “Symbolon është një proces ndarjeje dhe ribashkimi. Është proces rinjohje i vetvetes. Nuk më vjen keq, që  Symboloni i rikrijuar në sipërfaqe, nuk është identik me Symbolonin arketipal të thellësive të errëta, por është refleks shumë besnik i tij. Është një gënjeshtër e madhe… por jam artist, dhe si i tillë, zmadhoj rrezen e së vërtetës nëpërmjet saj. Ndoshta, ky është dimensioni i shenjtë i njeriut, zmadhimi i së vërtetës nëpërmjet gënjeshtrës. E vërteta dhe e pavërteta, janë SYMBOLON. E tillë është piktura ime.” thotë Gazmend Leka.