“Gërdeci” i parë në Shqipëri do regjistrohej 29 prillin e vitit 1997, kur dhjetëra banorë të fshatit Selitë në rrethin e Matit, do t’i drejtoheshin tuneleve të ushtrisë në Qafë Shtamë për të marrë armë dhe municione. Rënia e shtetit dhe çelja e depove ushtarake çoi në armatosjen e civilëve, duke prodhuar një situatë anarkie në të gjithë vendin.
Viti i trazirave prodhoi të parën tragjedi me një bilanc të rëndë, i cili do të pasohej nga Gërdeci i vërtetë, ai i 15 marsit 2008 me 26 të vdekur. Në një kohë kur tunelet ishin të mbushura me predha artilerie, banorët demontonin predhat e topave dhe ju merrnin bronzin për skrap. Më 15 mars teksa demontonin si zakonisht, një predhë shpërtheu dhe shkaktoi shpërthimin e gjithë monucionit në tunel duke lënë të vdekur 23 persona, të gjithë banorë të fshatit Selitë në Mat, me jo më shumë se 200 banorë.
Ekipet e emergjencës bënë të mundur nxjerrjen e trupave të 15 viktimave, ndërsa tetë të tjerë nuk u gjetën kurrë, për shkak se një pjesë e tunelit pësoi shembje.
Pas 21 vitesh, Ministria e Mbrojtjes ka ndërmarrë një aksion me Forcat Xhenio për pastrimin e tuneleve të ushtrisë nga municionet luftarake të mbetura aty që nga bastisja e 1997. Edhe zona përreth tuneleve ka prezencë të theksuar të predhave dhe municioneve të tjera luftarake.
Sot, gjatë gërmimeve në këtë tunel u gjet një skelet njeriu, i cili dyshohet se i përket pikërisht një prej viktimave të tragjedisë. Gërmimet në tunel pritet të zbulojnë edhe skelet e 7 personave të tjerë që humbën jetën në tunel, ndërsa trupat e tyre nuk u gjetën kurrë.
