Kryeministrja e Italisë Giorgia Meloni do të vizitojë ditën e mërkurë në 5 qershor, Shqipërinë ku do të pritet nga kreu i qeverisë Edi Rama. Vizita e Melonit do të ketë në fokus inspektimin e qendrave të emigrantëve që po ndërtohen nga qeveria Italiane në territorin shqiptar.

Zyrtarisht Këshilli i Ministrave bën me dije se kryeministrja Giorgia Meloni dhe Edi Rama në orën 11:15 do të vizitojnë zonën e Gjadrit në Lezhë, që mbulon protokolli i bashkëpunimit Itali-Shqipëri për çështjet e migracionit. Në Shëngjin në qendrën e pritjes së emigrantëve, në orën 12:20 Meloni do të zhvillojë një konferencë të përbashkët me kryeministrin Edi Rama.

Ndërkohë punimet për qendrën pritëse të emigrantëve në portin e Shëngjinit kanë përfunduat. Të hënën më (3 qershor) në këtë qendër mbërriti edhe policia italiane, që do të dislokohet në Shëngjin për të garantuar sigurinë e refugjatëve.

Fillimi i protokollit të marrëveshjes për emigrantët pritet të nisë më 15 shtator, ku është parashikuar që 13.5 milion euro të shkojnë vetëm për marrjen me qira të anijes e cila do të shoqërojë emigrantë deri në portin e Shëngjinit, shkruante dje La Repubblica.

Më 6 nëntor 2023 kryeministri Edi Rama dhe kryeministrja italiane Giorgia Meloni nënshkruan në Romë marrëveshjen për ndërtimin në Shqipëri të dy qendrave për strehimin e emigrantëve  të cilët shpëtohen në det nga anijet ushtaraka italiane apo ato të Guardia di Finanza-s derisa të merret një vendim për fatin e tyre, nëse do të pranohen ose jo në vendin fqinj.

Sipas marrëveshjes porti i zbarkimit do të jetë Shëngjini, ku do të ngrihet qendra e parë ndërsa Gjadri do të jetë kampi ku do të ndërtohet vendqëndrimi i tyre. Kapaciteti maksimal i numrit që do të presë qendra në Shqipëri nuk mund të jetë më shumë se 3 mijë emigrantë në muaj.  Në përfundim të procedurave të vlerësimit autoritetet italiane do të largojnë me shpenzimet e tyre emigrantët nga territori shqiptar.