Gjelbërimi i aksit Rinas -Tiranë, nis
faza e dytë,Koka: Vijojmë projektet

TIRANE - Pas përfundimit të fazës së parë të gjelbërimit të aksit rrugor Rinas -Tiranë, Ministri i Mjedisit, Lefter Koka inauguroi fillimin e punimeve të fazës së dytë të këtij projekti.

Ministri Koka ishte i pranishëm tek mbikalimi i Qafës së Kasharit ku filluan mbjelljet e fidanëve të parë. Gjatë bashkëbisedimit me drejtues të firmës së kontraktuar Ministri Koka u interesua për detajet e projektit duke kërkuar rigorozitet dhe zbatim të saktë dhe brenda afatit të të gjithë projektit.

Duke u shprehur për mediat, ministri Koka theksoi se në mbarim të gjelbërimit të segmentit të parë nga aeroporti i Rinasit deri në Qafë-Kashar, tashmë vizitorët kanë një ambient më mikpritës. Në këtë kontest, Koka theksoi se është shumë e rëndësishme që nisma të tilla të shtrihen edhe në akset e tjera rrugore për të siguruar një ambient të bukur dhe të shëndetshëm.

”Pas gjelbërimit të segmentit të parë, nga aeroporti i Rinasit, tashmë qytetarët apo vizitorët që vijnë në Shqipëri kanë një mjedis më mikpirtës. Ndaj është mjaft e rëndësishme të vijojmë projektet për gjelbërimin e akseve rrugore, për të siguruar një ambjent të bukur dhe të shëndetshëm për të gjithë qytetarët. Në këtë fazë, do të mbillen 1500 fidanë në një gjatësi prej 6 kilometrash në segmentin Qafë e Kasharit- Kthesa e Kamzës”.



Projekti konsiston në mbjelljen e pemëve dekorative, 1500 fidanë të mbi 10 llojeve të ndryshme, mes të cilave, dardhë dekorative, frashër, kumbull e kuqe, panje dekorative apo rrap.

Pjesë e këtij projekti janë edhe gjelbërimi i kanaleve anësore përgjatë segmentit rrugor, gjelbërimi i rrethrrotullimeve afër mbikalimeve, si dhe gjelbërimi i trafikndarëseve pas rehabilitimit të këtij segmenti. Gjithashtu do të ketë edhe një impiant modern vaditës. Projekti i financuar nga Ministria e Mjedisit, pritet të mbarojë brenda këtij viti.



Redaksia Online
(e.c/shqiptarja.com)