Gjyqi i Metës, Braho akuzon
e polemizon me Dvoranin

TIRANE- Rubrika Lunch.com, e gazetares Mira Kazhani në gazetën “shqiptarja.com” me gjyqtarin e Gjykatës së Lartë Ardian Dvorani, ka shkaktuar reagimin e një prej avokatëve të Ilir Metës, eksponent i lartë i LSI, Spartak Braho, polemikë në gazetën Mapo në numrin e djeshëm të saj.
Edhe pse zoti Braho nuk e përmend se ku është botuar biseda e gjyqtarit Dvorani me gazetaren, ai ka zgjedhur të polemizojë dhe të akuzojë gjyqtarin Dvorani se ndonjëherë “mund të ketë ngrënë ndonjë lugë çorbë të prishur”.

“Mundet që zoti Dvorani vuan në subkoshiencën e tij “të bërit pis”. Ndoshta mundet ti ketë ndodhur atij, ashtu siç thotë populli, që të ketë gëlltitur dikur një lugë çorbë të prishur dhe e vjell pastaj tërë jetën. Kjo lugë çorbë mund të jetë gatuar edhe me karrota politike, kur ai u rreshtua në tryeza partiake që janë të papranueshme për një pjestar të një pushteti të pavarur nga politika, jashtë etikës dhe betimit kushtetues së detyrës së një gjyqtari”, shkruan Spartak Braho.

Ndërkaq, konstatimit të gjyqtarit Dvorani se “procesi gjyqësor do të ishte më dinjitoz po të kishte vazhduar, Spartak Braho i përgjigjet:
“Si mund ti besosh këtij gjykatësi me deklarata të tilla kur vetë ai e kishte në dorë vendimin “dinjitoz” sic shprehet. Kam të drejtën morale qytetare dhe profesionale ta pyes gjykatësin që pasgjykon vendimin unanim të kolegjit penal të Gjykatës së Lartë: Përse ju nuk dhatë qëndrimin tuaj kundër me atë të dhënë nga kolegët e tu kur ju vetë e drejtuat këtë proces?”

Mandej, avokati Spartak Braho pranon se sistemi i drejtësisë ka probleme “por nuk mendoj si ju zoti Dvorani që të gjithë gjyqtarët janë bërë pis, vetëm se nuk përdoren si marioneta politike e ti shërbejnë një politike të caktuar”.
(ab/shqiptarja.com)