Gola dhe surpriza, Roma shënon tre gola për një pikë, shkëlqen Lazio

Lojtarët e Lazio-s, Ciro Immobile dhe Angel Correa

ITALI- Në Seria A është luajtur java e parë e cila ka prodhuar që në start rezultate surprizë. Në Olimpico Roma nuk ka shkuar më shumë se një barazim përballë Genoa edhe pse gjatë 90 minutave u shënuan 6 gola. 

Roma kaloi dy herë në avantazh gjatë ndeshjes me Cengiz Under, Edin Dzeko  por xhenovezët nuk u dorëzuan duke i barazuar po aq herë me Andrea Pinamontin dhe një penallti të Domenico Criscito. Në minutën e 70' Genoa shtangu kryeqytetasit e Italisë me Christian Kouame por Edin Dzeko i 'shpëtoi' të vetët me një gol në minutat e fundit. 


'Kushërinjtë' e Lazios nga ana tjetër shkëlqyen përballë Sampdorias në Genoa duke marrë një fitore të pastër 0-3. Për 'shqiponjat e kaltra' vendimtar rezultoi bomberi i ekipit Ciro Immobile me dy gola dhe transferi i bujshëm nga Atletico Madrid, Angelo Correa i cili debutoi me gol në kampionatin e Seria A. 

Sa i përket ndeshjeve të tjera të luajtura në Seria A të djelën, Atalanta mori një fitore të vështirë në fushën e SPAL me rezultain 2-3. Në këtë sfidë portieri i kombëtares shqiptare Etrit Berisha debutoi me skuadrën e re përballë ish- skuadrës së tij duke pësuar 3 gola dhe marrë humbjen e parë. 

Ndërkohë Brescia e ardhur nga Seria B fitoi në fushën e Cagliari. Hellas Verona dhe Bologna ndanë një barazim 1-1. Ndërsa Torino me golat e Zaza mori një fitore 2-1 në shtëpi ndaj Sassuolo. Nesër java e parë e Seria A mbyllet me sfidën Inter- Lecce. Kujtojmë se sot Milan humbi në Udinese me rezultatin 0-1 ndërsa Juventus ditën e djeshme mori një fitore minimale në Parma.

a.k./Shqiptarja.com
Komento