Sport

GOLAT/ Chelsea në rënie të lirë, Tottenham fiton derbin e Londrës

Tottenham triumfoi 2-0 me Chelsea në Londër, duke ftuar kështu derbin e kryeqytetit anglez.

Festa pas golit të parë

Redaksia 26 Shkurt 2023, 16:30 | Përditesimi: 26 Shkurt 2023, 16:33

Premier League e futbollit në Angli është në javën e 25-të. Tottenham triumfoi 2-0 me Chelsea në Londër, duke ftuar kështu derbin e kryeqytetit anglez. Blutë e Potter pësojnë humbjen e dytë radhazi, teksa kanë pesë ndeshje pa fitore duke qenë në rënie të lirë. Pas kësaj disfate trajneri i Chelsea rrezikon seriozisht shkarkimin.

Pa Antonio Conten në stol, Tottenham e nisi ndeshjen më mirë. Pjesa e parë nuk prodhoi gola, me lojën që u bë e fortë çka solli edhe tre kartona të verdhë. Goli i parë i takimit u shënua nga Skipp në minutën e 46, fill pas nisjes së pjesës së dytë.

Futbollisti i Spursave lëshoi një "predhë" nga jashtë zone, me sferën që nuk u kontrollua dot nga Kepa. Pas golit të pësuar, Chelsea nuk e pati forcën e reagimit, edhe pas ndryshimeve të shumta që u futën nga stoli. Minuta e 82 i vuri "vulën" tri pikëve të Spurs dhe për këtë mendoi kapiteni Kane që shënoi pas asistit të Dier.

LEXO EDHE:
Në qendër të merkatos, vjen një ofertë e papritur për Armando Brojën

Me këtë fitore Tottenham me 45 pikë mban vendin e katërt, teksa Chelsea mbetet në vendin e 10-të, 10 pikë larg zonës evropiane.

Rendit zhvillimet sipas orarit:

Ora 18:05

Graham Potter 'mbush kupën', trajneri i Chelsea pranë shkarkimit: Marr përgjegjësi të plotë

Tottenham triumfoi 2-0 me Chelsea në Londër, duke fituar kështu derbin e kryeqytetit anglez për javën e 25-të në Premier League. Blutë kanë pesë ndeshje pa fitore, me trajnerin Graham Potter që pas disfatës së sotme duket se ka "mbushur kupën" dhe është pranë shkarkimit. Pas ndeshjes trajneri i Chelsea ka pranuar gabimet, duke thënë se merr përgjegjësi të plotë.

“Unë e di përgjegjësinë. Nuk është mjaft e mirë për këtë klub. Unë marr përgjegjësinë e plotë për këto rezultate. Nuk është mjaft e mirë për Chelsean. E njoh personalitetin dhe cilësinë në ekip. Një periudhë e vështirë kohore. Besimi nuk është shumë i lartë. Presioni është i njëjtë në çdo punë, kudo. Nëse rezultatet nuk janë mjaftueshëm të mira, të cilat nuk janë, nuk mund të mbështeteni përgjithmonë te njerëzit e njëjtë. Detyra ime është të vazhdoj përpara", tha Potter.

S.DH/Shqiptarja.com