ANGLI - Manchester City triumfoi 1-2 me përmbysje të dielën kundër Liverpoolit, në supersfidën e raundit të 25-të të Premier League, duke marrë tri pikë jetike në garën për titullin kampion. Ndeshja në 'Anfield' ishte spektakolare.

Pjesa e parë u mbyll pa gola, me dy skuadrat që u treguan të kujdesshme, ndërsa fraksioni i dytë solli emocione të forta. Liverpool kaloi i pari në avantazh në minutën e 74-t, kur Szoboszlai dërgoi topin në rrjetë dhe ndezi entuziazmin e tifozëve vendas pas një goditje dënimi perfekte.

Reagimi i 'Qytetarëve' ishte i menjëhershëm. Në minutën e 84-t, Bernardo Silva barazoi shifrat pas asistit me kokë nga Haaland, duke rikthyer Cityn në lojë. Kur dukej se ndeshja po shkonte drejt barazimit, erdhi përmbysja e madhe. Në minutën e 93-të, Erling Haaland u tregua i saktë nga pika e bardhë dhe i dha fitoren skuadrës së Pep Guardiolës. Penalltia u shkaktua pas një pakujdesie nga portieri Alison.

Drama vijoi deri në shtesë, pasi në minutën e 100-të, City shënoi edhe golin e tretë me Cherki, por realizimi u anulua për faull të Haaland gjatë aksionit. Po në atë moment, Szoboszlai u ndëshkua me karton të kuq, pasi ndali në mënyrë të parregullt sulmuesin norvegjez. Më pas ishte radha e Gigio Donnarummas që të bënte një pritje të mrekullueshme dhe t'i jepte Cityt suksesin e plotë në mitikun 'Anfield'.

Me këtë sukses, Manchester City mban vendin e dytë në renditje me 50 pikë, duke ndjekur Arsenalin kryesues që ka 6 pikë më shumë. Liverpooli mbetet në vendin e gjashtë me 39 pikë.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 6 Shkurt, 23:06

    Kushtetuesja rrëzon Ramën dhe Balluku pezullohet, jeni dakord me vendimin?

Lajme të tjera