GOLAT/ Të rinjtë bëjnë ligjin në Superligë, Teuta i falet një 16-vjeçari kundër Skënderbeut! Laçi përmbys Vllazninë (Renditja)

Laçi fitoi sot 2-1 me Vllazninë për javën e katërt në Superligë. Edhe pse kaluan të parët në avantazh, shkodranët nuk mundën të mbanin dot epërsinë, duke u përmbysur nga kurbinasit. Pas ndeshjes folën trajnerët Skerdi Bejzade dhe Migen Memelli.

Trajneri i Laçit, Skerdi Bejzade u shpeh i lumtur me të tijtë, duke thënë se duhet të shënonin që në pjesën e parë.

"Sot kemi krijuar shumë raste për të shënuar në pjesën e parë. Kjo na rriti moralin që në pjesën e dytë të hynim për fitore. Festa e golit të dytë ndaj Vllaznisë? Ishte një gol shumë i bukur i Tresës. Është lojtar me të ardhme. Memelli ma bëri të vështirë punën, kishte ndërruar pozicionet e disa lojtarëve. Diferencën e bëri edhe shpirti i garës. Ia thashë lojtarëve që nëse nuk japin 100%, nuk mund të fitonin. Unë kam luajtur edhe vetë te Vllaznia, aty mungon grinta, luanin vetëm 4-5 lojtarë me 100% dhe të tjerët jo", tha Skerdi Bejzade.

Migen Memelli, trajneri i Vllaznisë kërkoi që të tijtë të punojnë më mirë me situatat e krijuara. Kujtojmë se Laçi i shkaktoi humbjen e parë Vllaznisë këtë sezon.

"Ndeshje e nisëm mirë, por duhej të menaxhonim më mirë situatën në pjesën e parë pas shënimit të golit. Kampionati sapo ka filluar. Djemtë kanë dhënë maksimumin. Nëse do të shënoheshin gol ato dy rastet e Grudës, do të ishte ndryshe. Më mërziti fakti që shkaktuam faull kur lojtari kundërshtar ishte me shpinë nga porta dhe më mërziti fakti që nuk kishim asnjë lojtar aty në momentin e goditjes te goli i parë", tha Migen Memelli.

Teuta fitoi 1-0 me Skënderbeun falë një goli të Arifit për javën e katërt në Superligë. Pas ndeshjes folën edhe dy trajnerët. Ivan Gvozdenovic i Skënderbeut e quajti ndeshje delikate, teksa i vuri fajin kalendarit të ngjeshur për këtë humbje.

"Kemi dy javë që kemi humbur. Nuk jam i kënaqur, sot ishte një ndeshje delikate. Kjo ndeshja sot ishte për barazim, por vendosi një moment. Nuk jemi të qartë në sulm, u treguam egoist në disa momente. Rashica hyri nga stoli pasi ishte i lodhur. Kemi shumë ndeshje për pak kohë, duhet të kemi edhe rotacione lojtarësh", tha serbi i Skënderbeut.

Nga ana tjetër, trajneri fitues, italiani Diego Longo komplimentoi të tijtë.

"Nuk e kishim detyrim fitoren, jemi një ekip i ri. Nëse ke ekipe si Partizani, Tirana apo Vllaznia, atëherë është ndryshe. Detyrimi jonë është stërvitja dhe impenjimi maksimal. Dua të komplimentoj Arifin, është një djalë serioz, e prisja që të shënonte një gol. Humbja me Laçin ishte e turpshme dhe ne duhej të sistemonim gjërat tona", tha Longo.

Në stadiumin "Niko Dovana" në Durrës, Teuta fitoi 1-0 kundër Skënderbeut, po për javën e katërt në Superligë. Ndeshja u vendos nga goli i Ergis Arifit në minutën e 25-të. Djaloshi 16-vjeçar e nisi ndeshjen nga minuta e parë, duke ia shpërblyer besimin Diego Longos. Megjithë rastet e ndeshjes, skuadrat nuk prodhuan më gola, me Skënderbeun që merr humbjen e dytë radhazi në transfertë. Nga ana tjetër, Teuta harron humbjen tenistike 6-1 në Laç, duke marrë tri pikë.

Në stadiumin e Laçit, vendasit e Skerdi Bejzades fituan 2-1 me Vllazninë për javën e katërt në Superligë. Kurbinasit i shkaktojnë kështu humbjen e parë shkodranëve, duke iu falur një supergoli të të riut Tresa në pjesën e dytë. Ndeshja nisi mirë për miqtë e Migen Memellit, që gjetën avantazhin pas vetëm tre minutave lojë. Ishte Lorik Boshnjaku që shënoi golin e parë, ndërsa u duk se Vllaznia do vendoste diktatin, por nuk ndodhi kështu. Në fundin e pjesës së parë, ishte Sobouale që barazoi rezultatin, për t'i dërguar skuadrat në paqe pas 45 minutave të para.

Në pjesën e dytë vendasit e Bejzades u treguan më të saktë, duke gjetur golin me Tresën. I riu u hodh në fushë në minutën e 62, teksa pas dhjetë minutash shënoi për avantazhin dhe të tri pikëve për kurbinasve. Kështu, bardhezinjtë i shkaktojnë humbjen e parë Vllaznisë këtë sezon.