ELBASAN- Grabitet teatri ‘Skampa’. Report Tv mëson se gjatë natës persona të paidentifikuar kanë thyer derën e pasme duke grabitur një shumë të konsiderueshme parash që gjendej në kasafortë.

Lajmi është konfirmuar edhe nga policia, e cila ka njoftuar se shërbimet e saj shkuan menjëherë në vendngjarje dhe nga veprimet e para hetimore dhe bazuar në deklaratën e Financieres së këtij institucioni rezulton se janë vjedhur rreth 4500 Euro në kasafortën e zyrës së Financieres së këtij institucioni dhe se kjo shumë parash ishte e saj personale të cilat i kishte lënë për ruajtje në zyrë.

Po në vijim të veprimeve në vendngjarje si dhe nga deklarimet e personave përgjegjës të zyrave rezulton se persona të paidentifikuar dyshohet të kenë hyrë nga dera e pasme e Teatrit Skampa por nuk kanë vjedhur asnjë send në pronësi të Insititucionit, por thjesht kanë hapur dyert e zyrave.

Grupi hetimor, po vijon hetimet për sqarimin e rrethanave të faktit të lënies së kësaj shume në ambientet e zyrës së financieres.

Shërbimet e policisë po punojnë për identifikimin dhe kapjen e autorëve.

Financierja është shprehur në polici se shumën ia kishte dërguar ditën e djeshme i vëllai nga Gjermania, ndërsa i kishte lënë në kasafortë për siguri, pasi bankat janë mbyllur në fundjavë.

Financierja ka deklaruar se të ardhurat e teatrit nga biletat nuk mbahen në kasafortë, por dërgohen menjëherë në bankë. 


[gallery]24761[/gallery]

 

 

 

 

 

dy.b/shqiptarja.com