Grafite me numrin 8.372 - që është numri zyrtar i viktimave të gjenocidit në Srebrenicë më 1995 - u vendosën dje (14 qershor) në muret e ambasadës hungareze dhe asaj sllovake në Sarajevë të Bosnje e Hercegovinës.
Grafitet u shfaqën tri javë pasi Asambleja e Përgjithshme e Kombeve të Bashkuara miratoi rezolutën që e shpalli 11 Korrikun Ditë Ndërkombëtare të Përkujtimit të Viktimave të Gjenocidit në Srebrenicë.
Hungaria ishte në mesin e 19 vendeve që iu bashkuan Serbisë në votimin kundër rezolutës. Sllovakia ishte në mesin e 68 vendeve që abstenuan.
Policia e Sarajevës më 14 qershor konfirmoi për Radion Evropa e Lirë se hetimi mbi grafitet në dy ambasadat kishte përfunduar dhe se incidenti ishte klasifikuar si vandalizëm.
Policia ka kryer gjithashtu një hetim më 14 qershor për fjalën "gjenocid" të shkruar me shkronja të kuqe në një ndërtesë banimi jo larg ambasadës serbe në Sarajevë.
Autoriteti i zbatimit të ligjit i ngarkuar me sigurimin e misioneve diplomatike në Bosnje e ndaloi Radion Evropa e Lirë të fotografonte grafitin, por fotografitë e tyre u publikuan në internet nga Shërbimi Publik i Republikës Sërpska.
Asnjëra nga ambasadat nuk komentoi mbi incidentin.
"Ne nuk duam të komentojmë. Ju i keni parë fotografitë. Sigurisht që kemi vërejtur, por nuk kemi koment", tha ambasada hungareze për Radion Evropa e Lirë.
Rezoluta e miratuar më 23 maj nxiti reagime të furishme në Serbi dhe në rajonin serb të Bosnjës, Republika Sërpska, ku udhëheqësit thanë se ai do ta etiketojë gjithë popullin serb si "mbështetës" të vrasjeve masive.
Rezoluta për Srebrenicën nuk e përmend as Serbinë, as Republikën Sërpska.
Ndër të tjera, ajo bën thirrje për "dënimin pa rezerva të çdo mohimi të gjenocidit në Srebrenicë, si dhe të veprimeve që i madhërojnë të dënuarit për krime lufte, përfshirë edhe ata që janë përgjegjës për gjenocidin".
Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007.
Ajo konstatoi se Serbia nuk ishte përgjegjëse për aktin e as bashkëpunëtore, por deklaroi se ajo nuk bëri asgjë për ta parandaluar atë.
Forcat serbe në këtë rajon lindor të Bosnje e Hercegovinës vranë mbi 8.000 burra dhe djem boshnjakë në korrik të vitit 1995.
Për gjenocidin e kryer, deri më tash, u dënuan më shumë se 50 persona me rreth 700 vjet burg./REL
Lajme të tjera
-
Vuçiç: Do të dekoroj përfaqësuesit e shteteve që votuan kundër Rezolutës për Srebrenicën
23 Shtator, 21:05 -
Presidenti Erdogan: Gaza si Srebrenica! Izraeli përgjegjës për vdekjen e aktivistit turko-amerikan
14 Shtator, 22:37 -
29 vjet nga masakra e Srebrenicës
11 Korrik, 08:03 -
Qeveria e Kosovës shpall 11 Korrikun Ditë Përkujtimore të Gjenocidit në Srebrenicë
10 Korrik, 15:19 -
Sot votohet rezoluta për Gjenocidin! Tensione në Srebrenicë, forca të shtuara policore e autoblinda në rrugë
23 Maj, 14:08 -
Bërnabiq thotë se propozimi i një rezolute për Srebrenicën është një ‘farsë’
23 Maj, 12:49 -
Dënon mohimin e gjenocidit, rezoluta për Srebrenicën votohet sot në Asamblenë e Përgjithshme të OKB-së
23 Maj, 07:34 -
Veton Surroi: Serbia nuk ka frikë nga fajësia, ka frikë nga përgjegjësia
22 Maj, 23:00
-
Nesër në asamblenë e OKB votohet rezoluta për Srebrenicën! Vuçiç: Duan të na dëmtojnë! Dodik: S’ishte gjenocid
22 Maj, 16:20 -
Rusia: Rezoluta për Srebrenicën është një provokim i madh
20 Maj, 14:10 -
Peter Szijarto: Hungaria do të votojë kundër rezolutës për Srebrenicën
15 Maj, 14:44 -
Në pritje të votimit, gjërat që duhet ditur për rezolutën për gjenocidin në Srebrenicë
15 Maj, 07:42
