Hajdari: S'u largova unë, PD-ja shkriu grupin, përfaqësojmë demokratët e vërtetë

Rudina Hajdari u sulmua sërish nga eksponentë të Partisë Demokratike pas krijimit të grupit parlamentar në Kuvendin e Shqipërisë. Si kryetare e grupit demokrat në parlament, Hajdari sqaron se nuk ishte ajo dhe Murrizi, që u larguan nga Partia Demokratike, por ishte kjo parti që vendosi njëkohësisht të ndërpresë përfaqësimin në Kuvend dhe të shkrijë Grupin Parlamentar të PD.

Vajza e Azem Hajdarit vendos edhe objektivat e grupit të ri parlamentar nën drejtimin e saj. Mes tre objektivave, ajo shprehet se synimi i grupit të ri është përfaqësimi i vërtetë dhe me integritet i Demokratëve dhe oponencës qytetare në Kuvend.

Sipas burimeve të Report Tv, Rudina Hajdari pritet të regjistrojë Partinë e re të së djathtës për t'u bërë pjesë e zgjedhjeve lokale. Report Tv mëson se Hajdari ka ngritur edhe grupet e punës për procedurat. Lëvizja e vajzës së liderit të Dhjetorit, pritet të mbledh pas vetes edhe gardën e vjetër të PD-së tashmë të përjashtuar nga Basha si Astrit Patozi e Jozefina Topalli.

Postimi i plotë i Rudina Hajdarit
"Grupi Parlamentar Demokrat" është krijuar në përputhje të plotë me Rregulloren e Kuvendit, ligjet në fuqi dhe Kushtetutën e Shqipërisë.

Sikurse unë ashtu edhe deputeti Myslim Murrizi nuk jemi larguar nga Grupi Parlamentar i Partisë Demokratike. Partia Demokratike me vendimin për "dorëzimin në bllok të mandateve" vendosi njëkohësisht të ndërprejë përfaqësimin në Kuvend dhe të shkrijë Grupin Parlamentar të PD.

Neni 15, pika e Rregullores së Kuvendit të Shqipërisë përcakton se:

"2. Për krijimin e një grupi parlamentar kërkohet një minimum prej 7 deputetësh.

Çdo deputet mund të jetë anëtar vetëm i një grupi parlamentar. Një deputet që largohet nga grupi parlamentar, mund t’i bashkohet një grupi tjetër parlamentar vetëm pas gjashtë muajve nga data e largimit".

Ndaj nuk jemi në kushtet e largimit nga Grupi Parlamentar i PD(dhe nuk është i vlefshëm kushti i afatit 6 mujor) por në rrethanat e gjendjes së faktit ku deputetët e Kuvendit në bazë përkatësisë partiake apo të orientimit politik në përputhje me Rregulloren vendosin për krijimin e Grupit Parlamentar.

Grupi Parlamentar Demokrat është krijuar mbi bazën e orientimit politik të djathtë me qëllim:

1. Zgjidhjen e krizës politike përmes Reformimit të sistemit zgjedhor (politik).

2. Përfaqësimin e vërtetë dhe me integritet të Demokratëve dhe oponencës qytetare në Kuvend.

3. Misionin për Integrimin e Shqipërisë në Bashkimin Evropian.

TAG:
• Rudina Hajdari
• opozita e re