105 turistë brenda në kanionin e Holtës, vërshimi i ujit rrëmbeu familjen nga Lushnja, mbytet vajza, shpëtohen katër fëmijë (VIDEO-Ekskluzive)

Report Tv siguron foton e 25-vjeçares Desantila Sollaku që u mbyt sot në kanionin e Holtës. Ajo jetonte në Savër të Lushnjes, ndërsa familja kishte vendosur të kalonin fundjavën në Holtë meqë vëllai, Denisi sapo ishte kthyer nga Gjermania, por e diela u kthye në tragjedi. Familja e 25-vjeçares merret me tregti, produkte ushqimore.

Report Tv sjell të tjera pamje si arritën që të shpëtohen katër fëmijët brenda kanionit të Holtës pas vërshimit të fuqishëm të ujërave.

Një turist tregoi për Report Tv tmerrin që përjetoi dhe si arriti që të shpëtonte vetë dhe njërin nga katër fëmijët nga rrjedha e lumit të Holtës që e mori përpara së bashku me shumë persona të tjerë që ishin brenda në kanion.

'Ne kemi shpëtuar njëri tjetrin. Na i sillte rryma njëri tjetrin nëpër duar, aq e fortë ishte. Vajzën e pamë që e mori uji, por ishim shumë larg dhe nuk bënim dot asgjë.

 Fëmijën që shpëtova ma solli dallga e ujit në duar. Ai ishte me të atin, të cilit i shpëtoi nga duart si pasojë e ujit të rrëmbyeshëm dhe ma solli mua në duar" tha ai.

Banorët e Holtës të pyetur nga gazetari i Report Tv Aldo Kozarja kanë treguar ngjarjen e sotme brenda kanionit që i mori jetën 25-vjeçares dhe rrezikoi shumë turistë të tjerë. "Ishin shumë persona në kanion, të tjerët dolën... Kjo që ndodhi është hera e parë. Nuk ka njeri që ti udhëzojë turistët, vetëm ajo që u themi ne" tha njëri prej tyre.

Ndërsa një tjetër banor theksoi se "Ngjarja ndodhi si pasojë e shirave të menjëhershëm. Turistët u futën por s'e kuptuan rrjedhjen e lumit. U mobilizuan të gjithë, por uji ishte i menjëhershëm dhe vajza nuk shpëtoi. Kjo njihet si zonë me prurje të menjëhershme, aq më tepër verës. Se kuptoj si nuk e kuptuan njerëzit brenda zhurmën e ujit" tha ai.  

Report Tv sjell pamje të tjera nga momentet e tmerrit ku rrezikuan mbytjen disa turistë në kanionet e Holtës, ndërsa një 25-vjeçare humbi jetën.

Kanioni i Holtes ne normalitet dhe ajo qe ndodhi pasditen e sotme
 

Kanioni i Holtës është një nga mrekullitë e natyrës dhe shumë e vizituar, por sot i mori jetën një vajze 25-vjeçe që u bllokua si pasojë e vërshimit të fuqishëm të ujërave nga shirat. Shkak i bllokimit të turistëve ishte jetë rritja e shpejtë e nivelit të ujit nga shirat që kanë rënë gjatë natës e mesditës së sotme si dhe nga përrenjtë që derdhen në kanionin e Holtës duke e kthyer në një përbindshëm që merr përpara gjithcka.

Report Tv sjell pamje të tjera nga operacioni i shpëtimit në kanionin e Holtës teksa duken polumbarët e RENEA-s që kontrollojnë nëse ka persona të tjerë.

Policia e Shtetit ka reaguar në lidhje me ngjarjen e rëndë të ndodhur në Kanionin e Holtës ku humbi jetën një 25-vjeçare si dhe u rrezikua jeta e 6 personave të tjerë. Policia njofton se personat e shpëtuar nuk kanë probleme me shëndetin ndërsa po vijon krehja e zonës për t'u siguruar nëse ka persona të tjerë që mund të jenë duke kërkuar ndihmë.

"Personat  qe kishin humbur kontaktet  ne kanionet e Gramshit jane gjetur nga Policia dhe Zjarrfikesit. Ne dalje te kanionin nje vajze rreth 25 vjece nga Lushnja eshte gjetur e pa jete si pasoje e rrembimit nga rryma e fuqishme e ujit, ndersa dy te tjeret nuk kane probleme per jeten.

Edhe  personat e tjere qe u gjeten me pare  nga policia nuk kane probleme per shendetin. Ne operacionin e kerkim-shpetimit eshte perfshire edhe Renea me polumbaret e saj. Nderko vijon krehja e zones se kanioneve per tu siguruar qe ska persona te tjere qe mund te kene nevoje per ndihme" thote policia. 

Report Tv sjell pamje ekskluzive nga kanioni i Holtës ku u mbyt 24-vjeçarja nga Lushnja si pasojë e rritjes së nivelit të ujit nga prurjet e shumta nga shirat që kanë rënë ditën e sotme. Në pamje duken turistët e tjerë dhe banorët e zonës duke u ardhur në ndihmë personave që iu rrezikua jeta. Mes 6 të shpëtuarve ishin edhe 4 fëmijë, teksa njëri prej tyre duket në pamje. Gazetari Aldo Kozarja raporton se dyshohet se mund të ketë persona të tjerë që mund të kenë nevojë për ndihmë, prandaj po kontrollohet e gjithë zona.

Identifikohet vajza që u mbyt pasditen e sotme te kanioni i Holtës. Ajo është Desantila Sallaku 24-vjeçe nga Lushnja. Ndërkohë që vëllai i saj dhe miku i familjes 50-vjeç janë shpëtuar. 33 persona të ndarë në dy grupe kishin shkuar në kanionin e Holtës me guidë.

Report Tv mëson se vajza që u mbyt në kanionin e Holtës është rreth 25 vjeçe. Ajo kishte shkuar së bashku me 32 persona të tjerë nga Puka të ndarë në dy grupe. I pari përbëhej nga 18 persona, ndërsa në grupin e dytë ku bënte pjesë edhe vajza që u mbyt ishin 15. Grupet nuk kanë qenë të organizuara mirë.

Një vajzë është mbytur në kanionin e Holtës pasditen e sotme. E ndërsa 4 fëmijë u shpëtuan, një vajzë e moshës rreth 20-vjeçe është gjetur e mbytur. Ende nuk dihet identiteti i viktimës. Ndërkohë që vijojnë kërkimet për gjetjen e një të riu dhe një burri rreth 50 -vjeç. 

Drejtori i Emergjencave Civile Haki Çako në një lidhje telefonike për Report Tv u shpreh se katër turistë janë shpëtuar, ndërsa për tre të tjerë vijojnë ende kërkimet në kanionin e Holtës.

"Është një situatë në kanionet e Holtës ku vizitohet shpesh në fundjavë. Për shkak të shirave ka prurje të shumta, janë kushtëzuar disa banorë, kanë ndërhyrë forcat duke shpëtuar 4 prej tyre, mbeten për t'u kontaktuar një djalë, një vajzë dhe një burrë rreth të 50-ave .

Po presim informacion nga momenti në moment, jemi në gatishmëri të plotë, ka shkuar edhe RENEA që ka grup të specializuar. Ka vështirësi për shkak të rritjes së prurjes së ujërave dhe terrenit të thyer, por jemi në ndjekje të operacionit, por nuk ka fëmijë që kanë nevojë për ndihmë" tha ai.