Hamas po forcon kontrollin e tij në Rripin e Gazës duke vendosur besnikë të tij në role kyçe qeveritare, duke mbledhur taksa dhe duke paguar rroga, sipas një vlerësimi të ushtrisë izraelite që Reuters ka parë dhe burimeve në enklavë.

Ndikimi i vazhdueshëm i Hamas në strukturat kryesore të pushtetit në Gaza ka nxitur skepticizëm të gjerë mbi perspektivat e planit të paqes të Presidentit të Shteteve të Bashkuara, Donald Trump, i cili kërkon që grupi militant të dorëzojë armët në këmbim të tërheqjes ushtarake izraelite nga territori.

Bordi i Paqes i Trump një trup ndërkombëtar i krijuar për të mbikëqyrur qeverisjen tranzitore të Gazës po mban mbledhjen e tij të parë në Uashington të enjten.

Sipas një dokumenti ushtarak izraelit të paraqitur Kryeministrit Benjamin Netanyahu në fund të janarit, “Hamas po merr hapa në terren për të ruajtur ndikimin dhe kontrollin e tij në Rripin e Gazës ‘nga poshtë lart’ duke integruar mbështetësit e tij në zyrat qeveritare, aparatet e sigurisë dhe autoritetet lokale”.

Hamas thotë se është i gatshëm t’i dorëzojë administrimin e enklavës një komiteti të teknokratëve të mbështetur nga SHBA, të kryesuar nga Ali Shaath, një ish-zyrtar i Autoritetit Palestinez në Bregun Perëndimor. Por grupi thotë se Izraeli ende nuk ka lejuar anëtarët e këtij komiteti të hyjnë në Gaza për të marrë përgjegjësitë e tyre.

Zyrtarët ushtarakë izraelitë thonë se Hamas i cili refuzon të dorëzojë armët ka shfrytëzuar një armëpushim tetor për të riafirmuar kontrollin në zonat që trupat izraelite i kanë liruar. Izraeli ende mban mbi gjysmën e territorit të Gazës, por pothuajse të gjithë më shumë se 2 milionë banorë janë në zonat nën kontroll të Hamasit.

Sipas dokumentit, të paktën 14 nga 17 ministritë e Gazës janë duke punuar, krahasuar me pesë ministri gjatë kulmit të luftës, dhe 13 nga 25 komunat e saj kanë rifilluar funksionimin.

Zëdhënësi i qeverisë së kontrolluar nga Hamas mohoi se këto ishin emërime të reja, duke thënë se zëvendësime të përkohshme janë gjetur për postet bosh gjatë luftës që të mos krijohej një “vakum administrativ”.

Sipas burimeve, Hamas ka emëruar pesë guvernatorë dhe katër kryebashkiakë për të zëvendësuar njerëzit e vrarë ose larguar gjatë luftës, dhe disa prej tyre kanë lidhje me krahun e armatosur të grupit.

Dokumenti izraelit thotë se Hamas mbledh taksa, kryesisht nga sektori privat, përfshirë tarifat e taksave mbi mallrat e kontrabanduara si cigaret, bateritë, panelet diellore dhe telefonat celularë. Hamas ka fituar qindra miliona shekelë duke mbledhur taksa mbi cigaret e kontrabanduara që kur filloi lufta.

Gjithashtu, Hamas vijon të paguajë pagat për punonjësit civilë dhe luftëtarët, që sipas disa burimeve arrijnë në mesatarisht rreth 1,500 shekelë në muaj./Reuters