Helmimi i rreth 1500 personave në Deçan, reagon Vjosa Osmani: Institucionet të hetojnë me urgjencë ngjarjen

Presidentja e Kosovës, Vjosa Osmani, ka reaguar në lidhje me ngjarjen e rëndë të regjistruar në Deçan, ku janë helmuar rreth 1500 persona. Me një postim në Facebook, Osmani i bën thirrje autoriteteve që të hetojnë me urgjencë ngjarjen, për zbardhjen e shkaqeve që kanë çuar në helmimin e qytetarëve.

"Pas lajmit shqetësues për helmimin e një numri të madh të qytetarëve të komunës së Deçanit, kam biseduar me Ministrin e Shëndetësisë, Arben Vitia, si dhe kryetarin e komunës së Deçanit, Bashkim Ramosaj, të cilët më kanë njoftuar për gjendjen e qytetarëve të helmuar dhe masat që janë marrë nga niveli qendror dhe komunal për t’ju qëndruar pranë qytetarëve të prekur.

LEXO EDHE:
U ndalua në Serbi, lirohet zëvendësdrejtori i Policisë së Kosovës

Pres nga të gjitha institucionet angazhim të mëtejmë e të plotë në ofrimin e trajtimit adekuat shëndetësor për qytetarët e helmuar, si dhe zbardhjen e shkaqeve që kanë çuar në helmimin e qytetarëve. Një hetim nga organet e drejtësisë është i domosdoshëm dhe duhet të trajtohet me urgjencë.

Qytetarëve të helmuar ju uroj shërim sa më parë dhe tejkalim të kësaj situate pa pasoja. Si Presidente e Republikës do të mbaj kontakte me të gjitha institucionet qendrore dhe komunale për t’u informuar lidhur me masat e ndërmarra për adresimin e këtij rasti shqetësues për shëndetin e qytetarëve tanë", thotë Vjosa Osmani.

Lajmi kryesor:

Helmim masiv në Deçan, 1500 qytetarë me simptoma, shpallet gjendja e jashtëzakonshme! Autoritetet e komunës: Kemi nevojë për mjekë

/SI.E./Shqiptarja.com

TAG:
• kosove
• helmimi
• media
• Deçan
• Vjosa Osmani
• uji i ndotur
• Bashkim Ramosaj