SHBA/ Historia tronditëse e vdekjes së studentit shqiptar, shoku i dha MDMA në vend të Adderall! Gjykata e dënon me 75 mln USD dëmshpërblim autorin

SHBA- Gjykata amerikane e Wayne në Detroit ka dënuar me një dëmshpërblim prej 75 milionë dollarësh të riun vendas Nick Remington, që akuzohet se u bë shkaktar i vdekjes së studentit shqiptar ekselent Denis Preka, 21 vjeç, në tragjedinë që ndodhi më 18 Mars të vitit 2019, duke i dhënë MDMA në vend të Adderall.

Por në atë që thekson familja e të riut, “pabesia” u bë nga shoku i tij i ngushtë, Paul Wiedmaier, që “Denisi e besonte si vëlla” dhe as nuk e ndihmoi, por i kërkoi shitësit të drogës që kishte ftuar atë natë në shtëpi, që t’i jepte drogën 21-vjeçarit shqiptar. Ata ishin takuar në shtëpinë e Paul për të studiuar së bashku, pasi po përgatiteshin për provimin e të nesërmes në universitet.

Për t’u përqendruar, Nick Remington i propozon dhe jep ilaçin Adderall, që kryesisht përdoret për t’u përqendruar më mirë dhe rezistuar. Por në fakt pas autopsisë dhe analizave, ajo rezultoi se ishte MDMA, droga më në modë tek të rinjtë, apo e quajtur edhe “Molly”, tip ekstazie që të jep adrenalinë, por edhe të rrezikon jetën nëse kthehet në mbidozë.

Dhe Preka nuk e kapërceu dot traumën e pësuar nga lënda psikotrope, teksa humbi jetën më pas, i pandihmuar nga 3 të tjerët.

Denis Preka gjatë diplomimit

Në faqen e hapur nga vetë familja e shqiptarit “DenisPreka.org”, mund të lexosh detaje të ndryshme, që nga ngjarja tragjike, ëndrrat e 21-vjeçarit dhe aktiviteti i tij deri ditën e fundit. Ai priste të diplomohej njëkohësisht në dy universitete në SHBA.

Familja rrëfen dinamikën dhe se si 3 “shokët” vranë Denisin

Familja nënvizon se vijoi betejën gjyqësore prej gati 5 vitesh dhe vendimi historik i Gjykatës prej 75 mln dollarësh amerikanë duket se ka vendosur drejtësinë për dëmin e shkaktuar.

“Natën e 18 marsit 2019, Denis shkoi në shtëpinë e Paul Wiedmaier, të cilin Denis e besonte si mikun e tij më të mirë. Ai synonte të kalonte natën duke studiuar dhe duke u përgatitur për një test të nesërmen. Në vend të kësaj, ai u tradhtua nga Pali dhe të nesërmen e nxorën të vdekur nga shtëpia. Kjo është historia se si Denisi u helmua, u sulmua dhe u vra, ndërsa "shoku i tij më i mirë" jo vetëm që nuk e ndihmoi atë, por ishte një bashkëpunëtor në krimin e tmerrshëm”, shkruhet në faqe.

Dhe më poshtë theksohet dinamika e ngjarjes fatkeqe.

“Paul më 18 mars 2019, ora 22:00 kishte ftuar në shtëpinë e tij dy miq: Connor Gibaratz dhe Nicholas Remington, një tregtar i njohur droge në Universitetin e Miçiganit. Në një moment të mbrëmjes, ndërsa Denisi po studionte, ai i kërkoi Paulit një Adderall, një pilulë e zakonshme për studimin, Paul i tha Denisit se nuk kishte Adderall. Në vend të kësaj, ai i tha Remington dhe Gibaratz se Denisi po kërkonte Adderall dhe plani ishte hartuar për të dehur Denisin me MDMA dhe Methylone në vend të kësaj”, shkruan familja.

Denis Preka në mbrëmjen e diplomimit

Gjithashtu familja nëpërmjet pamjeve, denoncoi të tre të rinjtë se në vend ta ndihmonin Denisin që mezi po merrte frymë, u tallën dhe dhunuan atë duke i hedhur një tjetër lëndë kimike në fytyrë. Autopsia zbuloi se shkaku i vdekjes ishte pikërisht droga që i shkaktoi edemë në tru dhe mushkëri, derisa i mori jetën.

Autopsia dhe “pabesia” e shokut të Denisit

“Rezultatet e toksikologjisë treguan sasi masive të MDMA dhe metilonit në sistemin e Denis. Gjatë gjithë sprovës katër orëshe, asnjëri prej tyre nuk telefonon 911 për të ndihmuar Denisin. Për më tepër, pasi e kuptojnë se ai kishte vdekur, ata vënë në veprim një ngjarje të rëndë për të mbuluar krimin dhe për të mbrojtur Nicholas Remington, ai që siguroi drogën që vrau Denisin”, shkruhet në faqe.

Në transkriptet e zbardhura, Remington pranon se i kishte dhënë Molly (MDMA) dhe Metilon, teksa të tjerët theksojnë se si ai i dha aq shumë drogë Denisit.

“Ajo që i ndodhi djalit tim është prova që Paul Wiedmaier nuk ishte një mik më i mirë apo një person për t'u besuar. Ai nuk kujdesej për sigurinë e Denisit dhe as për jetën e tij. Në vend të kësaj, ai lejoi një anëtar të varfër të komunitetit tonë, Nicholas Remington, brenda shtëpisë së tij dhe kontribuoi në katër orë vuajtje të paimagjinueshme për Denisin. Vuajtjet që vazhduan deri në frymën e fundit”, shkruan familja në fund të faqes, teksa këshillon prindërit që të kenë kujdes me fëmijët e tyre, t’u gjenden pranë dhe t’i ruajnë nga shoqëria jo e mirë.

Kush ishte Denis Preka, studenti që kërkonte të mbaronte dy Universitete

Denis Preka ka lindur në Bolzano të Italisë dhe shkoi në SHBA me nënën e tij kur ishte vetëm 1 vjeç. Ai shkoi në shkollën katolike St. Lawrence dhe më vonë ndoqi shkollën e mesme në Kolegjin De La Salle.

Denis Preka

Denis u diplomua me nderime, themeloi klubin Modeli i Kombeve të Bashkuara dhe mori pjesë në futboll, lakros, pistë dhe fushë dhe not. Ai vazhdoi karrierën e tij akademike në Universitetin e Detroit Mercy, duke u diplomuar në Psikologji dhe Biznes.

Më vonë, ai u transferua në shkollën e tij të ëndrrave, Universiteti i Miçiganit. Ai aspironte të ndiqte Shkollën e Biznesit Ross dhe të ndiqte një karrierë në Ligjin e Biznesit.

Denisit i pëlqente gjithashtu të udhëtonte dhe themeloi agjencinë e tij të udhëtimeve, Amerigo Travel, teksa merrte pjesë edhe në aktivitete me organizata joqeveritare apo bamirëse.

A.Q/Shqiptarja.com

TAG:
• SHBA
• detroit
• Denis Preka
• Nick Remington