Hoffman: Tiranë-Athinë-Romë, të
nënshkruajnë brenda vitit për TAP

TIRANE – Shqipëria, Greqia dhe Italia duhet të përshpejtojnë hapat për nënshkrimin e marrëveshjes teknike për projektin e gazsjellësit TAP. Kështu ka deklaruar drejtori i Komunikimit dhe Marrëdhënieve me Jashtë i TAP-it, Michael Hoffman gjatë një takimi në Tiranë me ministrin e Punëve të Jashtme, Edmond Panaritin.

“Në 3 mujorin e parë të vitit 2013 konsorciumi i Shah Deniz pritet të marrë një vendim përfundimtar midis gazsjellësve TAP dhe Nabucco. Për këtë arsye, shtoi ai, duhet të përshpejtojmë hapat për nënshkrimin e marrëveshjes teknike, midis 3 vendeve të interesuara, ndoshta brenda këtij viti.”, -u shpreh Hoffman.

Sipas njoftimit të zyrës së shtypit të ministrisë, thuhet se “Zoti Hoffman falenderoi Qeverinë shqiptare për ndihmën dhe mbështetjen e plotë që po i jep këtij projekti.”

Nga ana e tij, ministri Panariti theksoi edhe një herë rëndësinë stategjike që ka projekti TAP, jo vetëm për sigurinë energjetike të 3 vendeve të interesuara, por për mbarë rajonin dhe Evropën.

“Ai shprehu gatishmërinë e Qeverisë dhe institucioneve përkatëse shqiptare, për të kryer të gjitha hapat e nevojshme që ky projekt madhor të finalizohet me sukses.”, lexohet në njoftimin për shtyp të Ministrisë së Jashtme.

Shqipëria, Italia dhe Greqia nënshkruan më 28 shtator të këtij viti marrëveshjen politike për ndërtimin e gazsjellësit Trans Adriatik i cili nëse nëse miratohet nga një konsorcium investitorësh, do të lidhë tre vendet, duke sjellë gazin nga fushat Azerbajxhanit për në Perëndim. Marrëveshja për gazsjellësin TAP, u nënshkrua të enjten në mbrëmje në Nju Jork nga ministri i Jashtëm i Shqipërisë, Edmond Panariti, ministri i Jashtëm italian, Giulio Terzi dhe ai grek, Dimitris Avramopulos.

Redaksia Online

(Gre.M/Shqiptarja.com)