Hueyda: Pushimet më
të bukura me familjen!

Hueyda El Saied, ndan jetën e saj mes Romës dhe Parisit. Pasi ka lënë pas përvojën në mediat e Tiranës, balerina që u bë e njohur nga spektakli “12 vallëzime pa një të shtunë”, drejton revistën online “Edispot” ku është e pranishme jo vetëm si drejtuese por edhe me shkrimet e saj. Hueyda është e njohur për ekspolorimet e saj në botën e artit. Ka botuar dy libra dhe është duke punuar për librin e saj të tretë. Por ajo që karakterizon më së shumti këtë showgirl janë lëvizjet nga një vend në tjetrin. Nga Shqipëria në Francë, pastaj sërish në Tiranë për studimet e larta dhe më pas në Romë. Por zemra e saj mund të thuhet se është Parisi. 20 vitet e fundit të Hueydës janë të mbushura me udhëtime, ku sigurisht pushimet e verës zënë një vend të vecantë ndonëse nuk janë aq të planifikuara.

Pushimet verore priten me padurim nga të gjithë. Kur fillon të mendosh për to?
Nuk kam një moment të caktuar në të cilin filloj e mendoj për to. Kjo ndoshta lidhet dhe me faktin se pak herë në jetën time, kam pasur një punë që më ka kushtëzuar të planifikoja pushimet e mia në një periudhë të caktuar. Për mua pushimet rimojnë me një ndjesi të momentit, me një kuriozitet, me një takim, me një dëshirë, ndaj i planifikoj në momentin e fundit. Megjithatë prej disa kohësh kam bërë një listë me vendet që dëshiroj të vizitoj, gjë e cila më ndihmon jo pak.

Çfarë lloj pushimi preferon gjatë verës? Një pushim aktiv, apo pasiv, në mal apo në det…
Është një përzierje e të gjithave. Eksperienca më ka treguar se kur bëj plane për shembull për të bërë pushime pasive, pra të qëndroj vetëm në një vend, pas 2 ditësh e ndjej të nevojshme të lëviz. Po ashtu dhe pushimet në mal më pëlqejnë shumë, por për mua pushimet e arritura janë ato kur je e shoqëruar mirë, pavarësisht vendit.

Përgatitja e bagazheve të verës ndryshon nga ato të udhëtimeve e tjera. Çfarë ke merak të marrësh patjetër me vete?
Mos m’i kujtoni bagazhet, kam më shumë se 20 vite që udhëtoj dhe nuk kam mësuar ende të përgatis një valixhe të vogël. (qesh) Kam frikë gjithnjë mos harroj diçka, ndaj marrë gjithnjë më shumë sende apo veshje sesa kam nevojë. Sigurisht që nuk harroj kurrë, IPhone dhe IPadin, aparatin fotografik, librin dhe sigurisht një palë sandale me taka. (qesh)

Si kanë qenë pushimet verore për ty në kohë? Cilat të kane dhuruar kujtime më të bukura?
Me prindërit e mi, në jug të Francës, disa vite më parë. Ishte hera e parë që kaloja pushimet në familje. Mbetet me kujtimi më i bukur pasi; ishte një surprizë që na bëri im atë. Unë dhe ime ëmë kishim vendosur të kalonim pushimet të dyja dhe im atë i cili me sa duket u bë xheloz (qesh) sapo e mori vesh erdhi duke na bërë një surprizë. Aty e kuptova sesa me fat janë miqtë e mi që kanë një familje të bashkuar.

Cili është destinacioni yt i preferuar këtë vit dhe përse?
Nuk e kam vendosur ende, por Amerika Latine më tërheq, aq më tepër që dëshiroj të mësoj tangon argjentinase.
(Marre nga FUNDJAVA, e perjavshmja e gazetes Shqiptarja.com)
(sg/shqiptarja.com)

TAG:
• hueyda el saied