TIRANE - Plot 138 mijë euro të falsifikuara kanë arritur të këmbejnë dy djem në Tiranë.

Ngjarja ka ndodhur ditën e premte në një pikë këmbimi valutor në rrugën “Sami Frashëri”.

Dy të rinj kanë shkuar pranë pikës exchang-it në Tiranë dhe kanë këmbyar 138 mijë euro në lek. Ata i kanë dorëzuar pronarit të pikës së këmbimit valutor A.D, 239 kartmonedha prerje 500 euro dhe 90 kartmonedha prerje 200 euro, që në total bëjnë rreth 138 mijë euro.

Shuma e eurove është këmbyer në 180 milionë lekë të vjetra.

Fillimisht pronari i pikës së këmbimit valutor i ka parë eurot dhe nuk ka vrejtur që ato ishin false. Më pas ai i ka kaluar në një makineri të posaçme të cilat kanë zbuluar se mungonin elementët e sigurisë.

Kamerat e sigurisë filmuan të rinjtë
Dy të rinjtë pasi kanë këmbyer paratë janë larguar qetësisht nga pika e këmbimit valutor.

Policia ka sekuestruar kamerat e sigurisë ku dallohet fytyra e të dy djemve si dhe disa kamera të tjera, për të zbuluar rrugën që ndoqën autorët.

Denoncimi në polici: Ishin dy persona
Ndërkohë në dëshminë e tij A.D është shprehur se “Kur i mora eurot në fillim nuk i dallova që ishin fallco. I kontrollova me dore disa prej tyre, ndërsa më pas i këmbeva, pasi ishte shumë e lartë dhe përfitimi ishte i madh.

Jam i sigurt që janë false pasi kur i kontrollova përsëri letra ishte e dobët dhe mungonin 3-4 elementë sigurie”.

Pronari i pikës së këmbimit valutor ka thënë se u ka dhënë të rinjve rreth 18 milionë lekë të reja.

Redaksia Online
l.q/Shqiptarja.com