I shpëtoi atentatit mbrëmë në Shkodër, zbardhet dëshmia e Selami Brahimit: Plumbi më kapi në fytyrë, mund të më kishin qëlluar në kokë

Shkoder - Selami Brahimi, i cili i shpëtoi atentatit mbrëmjen e 8 shkurtit 2024 në dëshminë e dhënë para hetuesve ka deklaruar nuk ka konflikte dhe nuk e ka njohur atentatorin. Ai mbeti i plagosur nga breshëria e plumbave që u lëshuan në drejtim të tij, teksa po hipte në makinën që e kishte parkuar përballë një dyqani në lagjen Xhabije.

“Unë sapo lashë mbesën time tek një punonjës që është afër picerisë. Sapo jam ulur poshtë më kanë qëlluar. Kam shpëtuar për mrekulli sepse në atë moment jam kthyer dhe plumbi më kapi fytyrën sepse ndryshe mund të më kishin qëlluar në kokë. Nuk kam arritur që të shoh asgjë. Nuk kam asnjë problem me askënd dhe nuk e di kush mund të jenë autorët. Po ashtu nuk kam arritur që të shoh asnjë makinë apo mjet tjetër të autorëve. Nuk kam pasur asnjë kërcënim apo problem ndaj nuk e kam idenë se kush më ka qëlluar dhe për çfarë arsye!”

Brahimi u dërgua menjëherë në spital dhe është jashtë rrezikut për jetën. Ndërkohë, policia vijon hetimet me qëllim identifikimin dhe kapjen e autorëve të atentatit.Të shtënat krijuan panik në zonë. Në pamjet siguruara nga Report TV, qytetarët të tmerruar tentuan të gjenin strehë në një dyqan.

Sipas burimeve janë shoqëruar disa persona në komisariat ku po merren në pyetje ndërsa policia e Shkodrës dhe RENEA po kryejnë kontrolle intensive.  Në drejtim të 60 vjeçarit është qëlluar me kallashnikov 10 herë, por vetëm një plumb e ka prekur në pjesën e fytyrës. Drejtori i policisë së Shkodrës tha një natë më parë se po bëhet këqyrja e kamerave të sigurisë për identifikimin e autoreve qe tentuan te vrasin Selami Brahimin.

S.G/Shqiptarja.com

TAG:
• selami brahimi
• Shkoder