Ilir Kerni: Gjithë suksesin
ia dedikoj Mjeshtrit Alija

"E gjithë jeta ime është një kujtim për mjeshtrin Alija", ka thënë dje në homazhe balerini i njohur Ilir Kerni, i cili kishte ardhur nga Kroacia. "Lajmi për vdekjen e Agron Alisë më shokoi pa masë", tha ai në intervistën për Shqiptarja.com.

Ilir, keni ardhur posaçërisht për homazhet e Profesor Alisë?
-Erdha për t'i dhënë lamtumirën e fundit profesorit tim të dashur dhe të paharruar Agron Alisë. Atij unë i dedikohem totalisht për gjithë çka investuar tek unë. Ajo çfarë unë i dedikoj është pjesa ime. Por këtu shoh se kanë ardhur të gjithë kërcimtarët që kanë dalë nga dora e tij. Disa nga ata shkëlqejnë edhe nëpër botë. Jam i sigurt që Agron Alija është një nga personalitetet më të shquara të këtij kombi. Ai do të udhëtoj në mendjen time gjatë gjithë karrierës dhe eksperiencave skenike. Jam ende i tronditur dhe më dhemb shpirti që ai nuk jeton më.

Si e përjetuat lajmin për vdekjen e tij?
-Ishte një shok, një shok i vërtetë. Por ja që ai u shua dhe nuk do të ma merrte mendja se do të ikte kështu, kaq tragjikisht,kaq aksidentalisht.

Kur dëgjuat për aksidentin, patët shpresa se do të shpëtonte?
-Po. Nuk mendoja kurrë se mund të dorëzohej kaq shpejt, sepse e dija se ka qenë shumë i fuqishëm si fizik dhe ja që këto gjëra ndodhin.

Një kujtim që e sillni të parin ndërmend, cili është?
-E gjithë jeta ime është kujtim për mjeshtrin e madh Alija. E gjithë karriera ime në skenë, jeta dhe sukseset janë të lidhura me të dhe me emrin e tij. S'më kujtohet nëse kam qenë 20 apo 21 vjeç kur më besoi rolet e para, por më kujtohet dhe e di mjaft mirë se ai më dha besimin dhe frymëzimin për të qenë ai që jam sot.

Po të mos ishte ai?
-Absolutisht ia dedikoj atij gjithë frymëzimin, suksesin, mësimet, angazhimin tim më skenë. Unë ia mora mësimet atij dhe ai jeton me mua. Fjalët dhe mësimet e tij i marr me vete kudo.

(dhh/im/shqiptarja.com)