PER PRESIDENTIN KAM KOHE
Meta vuri theksin tek rëndësia e një procesi konsensual për zgjedhjen e presidentit i cili nuk mund të zhvillohet nëse nuk realizohet reforma parlamentare, zgjedhore dhe heqja së imunitetit. Ai nënvizoi ndërtimin e një procesi bashkëpunimi mes mazhorancës dhe opozitës edhe pas zgjedhjes së Presidentit apo Presidentes së re të vendit.
“ Dua të theksoj rëndësinë e këtij momenti të rëndësishëm politik. Është emergjente bashkimi i votave për ti dhënë fund reformës zgjedhore, parlamentare dhe zgjidhjes së cështjes së imunitetit. Sa i takon presidentit është e rëndësishme të theksoj rëndësinë që ka procesi jo për plotësimin e një vendi që lirohet në kohën e duhur por në kuptimin e funksionimit të duhur të një institucioni tepër të rëndësishëm dhe për vijimin konsensual të reformave. Kështu duhet parë i gjithë procesi”- tha Meta.
Meta u përgjigj dhe në lidhje dhe deklaratat e djeshme të Luan Ramës për faktin se edhe Meta mund të jetë një kandidat për President. “Mirëkuptoj propozimin e Luan Ramës dhe e ftoj publikisht të kandidonte për kryetar të LSI-së.Kandidimi im është ai për kryetar të LSI. Ndërsa për një kandidim për president, kemi 30 vjet përpara për ta çmuar së bashku kur do të ishte moment i përshtatshëm për të kontribuar"- tha Meta.
Ai nënvizoi se “Çështja e zgjidhjes së presidentit duhet parë si proces politik dhe do të ishte dritëshkurtësi të shihet si proces ekonomik dhe se zgjedhjet e parakohshme janë të panevojshme. Nëse reforma realizohet përsëri do të duhet kohë që të implementohen ndryshimet që do të bëhen në Kodin Zgjedhor.”
DO PRANOJA FTESEN E RAMES
I pyetur nga gazetarët në lidhje me darkën me Edi Ramën në shtëpinë e tij në Gjirin e Lalëzit, Meta dha disa detaje të darkës duke shtuar se do të pranonte ftesën e kreut socialist për një darkë tjetër. “Kam dëgjuar fantazi të ndryshme, është hedhur dyshim se kjo darkë është ngrënë natën, por darka hahet natën. E sigurtë që produkte deti ishin, normale, darka ishte buzë detit. Absolutisht do të pranoj nëse do kisha ftesë për darkë në shtëpinë e Ramës. Edhe kur nuk isha i ftuar në dasëm i çova buçetën më të bukur”
(sg/shqiptarja.com)