Meta: 2022 rriti varfërinë, qeveria më pak lekë qytetarëve se oligarkëve! Opozita bashkë më 14 maj? Pengu i Ramës s'e gjen dot rrugën drejt bashkimit (VIDEO)

Takimet e kreut të qeverisë me ministrat, krerët e institucioneve dhe krerët e qarqeve, Meta i cilëson si veprime të kryeministrit për t’u dukur sikur punon. Sipas tij, Rama di vetëm të mashtrojë e të vjedhë.

“I bën për tu dukur sikur punon shumë ndërsa punon vetëm për t’i vjedhur. Jep bukë për 1 muaj për pensionistët dhe në një ditë jep 300-400 milionë euro për klientët e vet. E dini çfarë po ndodh me aferat që janë korrupsion i përbindshëm. E vetmja përpjekje e tij është si të mashtrojë shqiptarët dhe t’ua fusë thikën sa më thellë se nuk ka asnjë interes në zhvillimin e vendit, në procesin europian. Po të kishte interesa nuk do të çonte administratën në këtë nivel. Sa më shumë e shton administratën, aq më shumë shtohen gjobëvënësit e grabitësit në zyrat e shtetit në çdo nivel nga Saranda në Tropojë”, tha Meta.

Kryetari i Partisë së Lirisë, Ilir Meta ka zgjedhur të mos e komentojë kalimin e deputetit Agron Çela nga PL te Partia Socialiste.

“Nuk shqetësohem për merkatot e Rilindjes. PL do jetë një faktor vendimtar për të realizuar këtë ndryshim që presin qytetarët shqiptar në të gjithë Shqipërinë. Do jetë faktor për triumfin e kandidatëve të opozitës, në Tiranë Belind Këllici, në Durrës Igli Cara, në Elbasan Luciano Boci. Përballja e PL me këtë regjim mafioz që ka nxjerrë në tregun e zi cdo interes publik.

 Nuk jam këtu për tu marrë me cështje të cilat i mbulon Spiropali. Nuk merrem me të deleguarën e Rilindjes, por me Edi Ramën që do të cmontohet. Nuk e shpëton asnjë përpjekje e cfarëdollojshme mafioze që ai bën. Besoj se kjo është shumë e qartë.

Sali Berisha i mundi të gjithë më 6 mars në Shkodër pa vulë e pa seli. Kudo rritja e Partisë së Lirisë do jetë spektakolare”, tha Meta.

Për kryetarin e Partisë së Lirisë Ilir Meta opozita ka kërkuar bashkim të të gjithë grupeve të interesit në funksion të 14 majit. I pyetur nga gazetarja e Report Tv Danjela Maloku nëse ka nxitur Berishën për të bashkuar PD-në për maksimalizimin e votave, Meta tha se ka ndonjë peng të Ramës në opozitë që do ta ketë të vështirë rrugën drejt bashkimit, ( duke iu referuar grupit të PD-së së Alibeajt)

“Mesazhi im ka qenë i qartë gjithmonë për një bashkëpunim shumë të gjerë, edhe të gjithë faktorët e shoqërisë civile dhe grupeve të interesit që duan ndryshim dhe vuajnë pasojat e kësaj qeverisjeje. Nuk i intereson shumë sigla por mbarëvatja e punëve të tyre dhe të gjitha shqetësimet e përbashkëta që kemi. Mesazhet edhe nga ana e z. Berisha kanë qenë të qarta mbi gjithëpërfshirje bazuar mbi votë por edhe bazuar mbi vullnetin e qëllimit të përbashkët që është ç ‘kapja e shtetit.

Kushdo që e ka prioritet përballjen me këtë regjim mafioz që është përgjegjës për varfërimin, krizën dhe shpopullimin padyshim që është mënyrën dhe e shpreh vullnetin për tu bashkuar. Nëse dikush është peng i Edi Ramës do ta ketë të pamundur ta gjejë këtë rrugë. Për shqiptarët do të jenë kandidatët e shpopullimit (kukullat e Edi Ramës) dhe kandidatët e ndryshimit”, tha Meta.

Kryetari i Partisë së Lirisë, Ilir Meta thotë se Edi Rama nuk do të pranojë garën e barabartë në zgjedhjet e 14 majit, por është i bindur se do të arrijnë të mposhtin PS.

“Besoj se jemi shumë të qartë, nuk kemi iluzione që gara e 14 majit do jetë e barabratë. Rama me ato afera që ka kryer do të pranonte një garë të barabartë e të mos pranonte shtetin e inkriminuar. Por jemi të sigurt se qytetarët shqiptarë do të japin përgjigjen e merituar këtij menaxhimi mafioz të pushtetit. Në këto 4 vite, pushteti vendor ka qenë i paligjshëm dhe tërësisht bunker për qytetarët. Rilindja jo vetëm që ka patur përgjegjësitë por pjesë e madhe e bashkive kanë shpallur falimentimin. Nuk besoj se të gjitha përpjekjet monstruoze që bën kjo qeveri në kundërshtim të qartë me të gjitha standardet demokratike do t’i kenë rezultatet që shpreson për arsyen se qytetarët e kuptojnë se çkapja e shtetit do t’i japë frymëmarrje. Do garantojë llogaridhënien që është përjashtuar dhe në çdo rast e dini që zgjedhjet e 14 majit janë tmerr për Ramën se e kontrollon 100%. Ai e di mirë që situata në 14 maj do jetë mesazh i fortë ndryshimi”, tha Meta.

Kryetari i Partisë së Lirisë Ilir Meta tha se 2023 do të jetë viti i ndryshimit.

“Viti ku kemi hyrë është shumë i rëndësishëm. Do të jetë viti i ndryshimit që të mos jetë viti i falimentimit të ekonomisë sonë dhe ekonomive familjare. Të mos jetë viti i varfërimit dhe i shpopullimit. Ndaj ne jemi të bindur se së bashkë me qytetarët do të bëjmë të mundut ç’kapjen e shtetit dhe nisjen e një ndryshimi të madh.

Një gjë është e sigurt, 2023 do të jetë viti i ndryshimit. Sa i takon marrëdhënies me PD, është e shkëlqyer dhe takimet tona janë të vazhdueshme. Jemi të hapur për bashkëpunim me çdo faktor opozitar në interes të ndryshimit të kësaj situate dhe të rendit kushtetues, të llogaridhënies dhe për t’i dhënë fund kapjes së shtetit. Regjimin nuk e vuan vetëm opozita por të gjithë qytetarët shqiptar sepse korrupsioni është shkaku pse jemi të parët për varfëri jo vetëm në rajonin tonë por edhe në kontinent. Opozita do të jetë kudo, duke vijuar denoncimet e saj jo vetëm mediatike, por edhe në terren e insticuonet e drejtësisë edhe kur i mbajnë në sirtar. Opozita do të jetë kudo ku janë qytetarët që e kërkojnë ndryshimin”, tha Meta.

Kryetari i Partisë së Lirisë, Ilir Meta e ka nisur konferencën për shtyp për vitin 2023 duke komentuar ‘Pakon e Madhe’ të qeverisë duke thënë se është minimale. Sipas tij, janë shpërdoruar 1 miliard euro të taksave shqiptare ndërsa borxhi publik ka arritur mbi 107%. Po ashtu hedh akuza ndaj Ramës se ka hedhur 100 milionë euro në llogaritë e disa oligarkëve më 27 dhjetor.

“Pa ndalur në vlerësimet për vitin e vështirë që lamë pas dhe mund të konsiderohet si vit ii rritjes së varfërisë dhe i vazhdimisht të shpopullimit nuk mund të rrija pa e nisur me denoncimin e pilulës mashtruese elektorale me zero impakt nga ana e qeverisë së Rilindjes.  “Rama u ndan pensionistëve nga 8 mijë lekë shpërblim në vit, vetëm disa bukë në muaj që nuk mjaftojnë as për mbijetesë.  Në mbledhjen e datës 12 dhjetor 2022, Qeveria ka miratuar 36 vendime për shtesë fondi në procesin e rindërtimit, sikur tërmeti ka rënë në këtë datë dhe jo në 2019. Me këto 36 vendime brenda 1 dite, Qeveria ka shtuar 158 milionë euro për klientët ndërtues që po bëjnë rindërtimin e banesave, të cilat do t’i administrojnë e shpërndajnë pa tenderë kryetarët e bashkive, si gjoja financime emergjence. Ndërkohë që ndahen këto fonde për rindërtimin e banesave, muajin e kaluar (dhjetor 2022) Fondi Monetar Ndërkombëtar i kërkoi qeverisë shqiptare “të zbatojë menjëherë” masa për transparencë dhe llogaridhënie për fondet e emergjencave të tërmetit dhe pandemisë. 55% e fondit të investimeve u shpërnda vetëm për muajin dhjetor me akt normativ duke marrë dhe rreth 20 milion dollarë nga fondi i rezistencës sociale, për t’ja u çuar klientëve të vet. Në total gati 258 milion euro për një grusht oligarkësh si “shpërblim” për Vitin e Ri dhe 80 milion euro për 1 milion shqiptarë”, denoncoi kryetari i Partisë së Lirisë”, tha Meta.