KANADA - Gianni Infantino e ka përsëritur pjesëmarrjen e Iranit në Kupën e Botës 2026 për të pesëmbëdhjetin herë. Presidenti i FIFA-s e përsëriti këtë gjatë fjalimit të tij në Kongresin e FIFA-s, i cili u hap dje në Vancouver të Kanadasë.

"Fillimisht, dua të konfirmoj pa mëdyshje se Irani sigurisht që do të marrë pjesë në Kupën e Botës 2026. Dhe sigurisht, Irani do të luajë në Shtetet e Bashkuara të Amerikës", tha Infantino.

"Ne duhet t'i bashkojmë njerëzit, është përgjegjësia ime dhe e jona. Futbolli dhe FIFA bashkojnë botën. Duhet të jemi pozitivë, të buzëqeshur dhe të lumtur. Ka mjaft probleme në botë, mjaft njerëz që përpiqen të ndajnë. Nëse askush nuk përpiqet të bashkojë njerëzit, çfarë do të ndodhë me botën tonë? Ne e kemi këtë mundësi. Së bashku, jemi të pamposhtur".

Presidenti i FIFA-s u përpoq kështu të shpërndante çdo dyshim, edhe pse, në fillim të armiqësive, vetë qeveria iraniane kishte ngritur mundësinë e bojkotimit të Kupës së Botës.

Pak më pas, presidenti amerikan e përsëriti: "Epo, nëse Gianni e tha, është në rregull për mua", tha Trump, duke iu përgjigjur një pyetjeje në lidhje me komentet e Infantinos, me të cilin udhëheqësi amerikan mban lidhje të ngushta. "Gianni është fantastik dhe nëse e ka thënë ai, mendoj se duhet t'i lëmë të luajnë."

Përjashtohen zyrtarët e Iranit - Ndërkohë, presidentit të Federatës Iraniane të Futbollit iu ndalua hyrja në Kanada për të marrë pjesë në Kongres. Mehdi Taj tha se u kthye mbrapsht në Aeroportin 'Pearson' të Torontos së bashku me Sekretarin e Përgjithshëm, Hedayat Mombeni dhe zëvendësin e tij, Hamed Momeni, pavarësisht se kishin viza të vlefshme, duke denoncuar "sjelljen e papranueshme" nga zyrtarët e imigracionit.

Nga ana kanadeze, versioni është se delegatët iranianë u kthyen në Turqi për shkak të lidhjeve të tyre të dyshuara me Trupat e Gardës Revolucionare Islamike, e cila është listuar si një organizatë terroriste që nga viti 2024.

Irani fillimisht nuk pranoi të luante në SHBA duke i zhvendosur ndeshjet në Meksikë për shkak të konfliktit të fundit në Lindjen e Mesme dhe bombardimeve nga SHBA dhe Izraeli.

Kupa e Botës 2026 do të zhvillohet nga 11 qershori deri më 19 korrik në SHBA, Meksikë dhe Kanada, teksa për herë të parë do marrin pjesë 48 ekipe në 12 grupe. Irani do të përballet në Grupin G me Zelandën e Re më 15 qershor, Belgjikën më 21 qershor dhe Egjiptin më 26 qershor.

Rendit zhvillimet sipas orarit:
Ora 13:04
Infantino: Janë shitur 90 % e biletave të Kupës së Botës 2026

1777633486_gianniinfantino.jpg

Presidenti i FIFA-s, Gianni Infantino, ka reaguar ndaj kritikave për çmimet e biletave të Kupës së Botës 2026, duke theksuar se kërkesa mbetet shumë e lartë dhe shumica e tyre tashmë janë shitur.

Në fjalimin para Kongresit të FIFA-s, Infantino deklaroi se: “Ne kemi shitur 100 % të biletave që kemi nxjerrë në shitje, që është rreth 90 % e totalit deri më tani. Dhe sigurisht, ne vazhdojmë të lëshojmë bileta të tjera në treg.”

Ai iu referua gjithashtu debatit për çmimet, duke shtuar: “Sigurisht, ka bileta të shtrenjta dhe ka edhe bileta më të përballueshme. Dhe gjëja e rëndësishme është që të gjitha të ardhurat që gjenerojmë globalisht të kthehen tek ju, të kthehen në të gjithë botën dhe të financojnë futbollin në të gjitha vendet tuaja”, theksoi Infantino.

Më herët gjatë javës, FIFA njoftoi një mbështetje shtesë financiare për ekipet pjesëmarrëse në turne, duke premtuar 100 milionë dollarë shtesë për të ndihmuar në përballimin e kostove të larta. Po ashtu, Këshilli i FIFA-s ka miratuar një rritje prej 2 milionë dollarësh në pagesat bazë për secilën federatë, duke e çuar shumën minimale në 12.5 milionë dollarë. Organi drejtues pret që turneu të gjenerojë të ardhura prej të paktën 11 miliardë dollarësh.

S.Dh/Shqiptarja.com

Ora 09:17
VIDEO/ Tension në Kongresin e FIFA-s, zyrtarët e Federatës së Izraelit dhe Palestinës refuzojnë të shtrëngojnë duart para Infantinos

KANADA - Kongresi i 76-të i FIFA-s ishte skena e një momenti të sikletshëm të enjten. Presidenti Gianni Infantino priti në skenë përfaqësues nga federatat izraelite dhe palestineze e futbollit, në eventin e mbajtur në Vancouver të Kanadasë. Megjithatë, ndërsa përpiqej t'i bënte ata të shtrëngonin duart, ai humbi kontrollin e situatës.

Palestinezi Jibril Rajoub refuzoi t’i shtrëngonte duart Basim Sheikhun, nënkryetarit të Federatës Izraelite. Përplasja zgjati disa minuta, përpara një audience të përbërë nga zyrtarë nga të gjitha vendet anëtare të FIFA-s dhe të ftuar.

Infantino këmbënguli dhe u përpoq ta bindte Rajoubin të shtrëngonte duart me Sheikhun, i cili qëndroi i heshtur gjatë gjithë kohës. Ai (Infantino) madje u ngjit në podium dhe foli në mikrofon, duke thënë se të gjitha federatat duhet t'i dërgojnë një mesazh uniteti botës dhe veçanërisht fëmijëve.

Të dy zyrtarët thjesht përshëndetën Infantinon dhe u larguan nga skena. Përpara se t’i thoshte mirupafshim presidentit të FIFA-s, Rajub foli disa fjalë me zë të lartë në arabisht. Susan Shalabi, nënkryetare e federatës palestineze dhe gjithashtu e pranishme, i transmetoi agjencisë së lajmeve Reuters atë që kishte thënë bashkëkombasi i saj.

"Nuk mund t’i shtrëngoj duart dikujt që izraelitët e sollën për të mbuluar fashizmin dhe gjenocidin e tyre. Ne po vuajmë", tha ai.

Ndërkohë, presidenti i FIFA-s, Gianni Infantino, konfirmoi qëllimin e tij për të kandiduar për një mandat të katërt vitin e ardhshëm.

S.Dh/Shqiptarja.com