Interes nga Juventusi, Mario Mitaj: Sylvinho sheh veten te unë, ëndërroj Barcelonën

Mario Mitaj, mbrojtësi i Kombëtares është rrëfyer në një bisedë të gjatë për "gazzetta.gr", aty ku ka treguar edhe të kaluarën te AEK-u i Athinës, fillimet e karrierës dhe ëndrrat.

Mbrojtësi që shkëlqeu me Kombëtaren në Euro 2024 tha se në Greqi do rikthehej vetëm për AEK-un, ndërsa komentoi edhe ofertat në merkato. Për të ka interes nga Juventusi dhe disa klube në Serie A, ndërsa ai ka ëndërr Barcelonën.

Raporti me Sylvinhon për të është i veçantë, pasi trajneri kuqezi sheh veten te ai.

Si u ndjetë kur mësuat se do të jeni në misionin “Euro 2024” me kombëtaren shqiptare?

Ishte hera e parë që trajneri njoftoi thirrjet në një konferencë për shtyp. U ndjeva shumë krenar dhe i lumtur që në moshën 20- vjeçare mund të përfaqësoj vendin tim në një event të tillë. Mendoj se është diçka që mund ta përjetosh vetëm një herë në jetë. Sidomos kur je anëtar i një vendi që nuk shkon shpesh në turne të tilla. Ndjeva një lehtësim të madh kur pashë emrin tim.

Cili ishte sekreti i suksesit të Sylvinhos?

Mendoj se që nga momenti kur mori Kombëtaren, ajo që u përpoq të bënte ishte të mbante mirë dhomën e zhveshjes, pra atmosferën mes nesh. Ky për mua ishte sekreti dhe doli edhe në fushë. Kjo është arsyeja pse me skuadra si Republika Çeke dhe Polonia ia dolëm mbanë dhe morëm fitore të mëdha në kualifikuese.

Kombëtarja shqiptare u gjend në një nga grupet më të vështira në “Euro”, si u ndjetë përballë lojtarëve të këtij kalibri?

Përgjithësisht nuk jam kurrë nervoz kur luaj, që nga momenti që do të futem në fushë s’do të jem nervoz. U ndjeva i lumtur që luaja me Italinë, mezi prisja të hyja në fushë, të shihja lojtarë që dikur i shihja në televizion. Doja të përballesha me ta dhe të shihja ndryshimin në nivel që mund të kisha me ta.

A ka pasur ndonjë lojtar që ju ka rënë në sy në ndeshjet që keni luajtur?

Më pëlqyen shumë Chiesa, Yamal, i cili për moshën e tij është vërtet i jashtëzakonshëm. Më pëlqeu shumë Kovaçiç si lojtar.

Mendoni se Shqipëria mund të bënte më mirë në Europian?

Nëse përjashtoni ndeshjen e parë kundër Italisë, veçanërisht pjesën e parë që ishte një përshtatje, ne kishim një paraqitje shumë të mirë në përgjithësi. Me Kroacinë mund të fitonim. Me Spanjën luftuam deri në fund… Mendoj se edhe në një përqindje, 10% kishim mundësi të kalonim në fazën tjetër.

Si ju lë përvoja në “Euro”?

Unë mendoj se është fillimi i diçkaje më të madhe.

Cili ekip është favorit për ta fituar turneun?

Spanja dhe Portugalia.

Cila kombëtare ka zhgënjyer?

Anglia, sepse me gjithë ata lojtarë cilësorë që ka, ajo duhet të dominonte, por diçka e tillë nuk është parë.

E keni menduar ndonjëherë të garoni në kombëtaren greke?

Në kombëtaret e moshave kam shkuar edhe në kombëtaren e Greqisë dhe atë të Shqipërisë. Kur firmosa kontratën time të parë me AEK-un, e dija që doja të luaja për Shqipërinë.

Çfarë ju bëri përshtypje në Europian?

Ne të gjithë mbetëm pa fjalë kur dolëm në nxehje në ndeshjen kundër Italisë. Ne po xhironim video, atmosfera ishte vërtet e pabesueshme. Organizimi ishte gjithashtu perfekt, deri në detajet më të vogla. Nuk kishte asnjë gabim.

Cila nga tri ndeshjet ishte më e vështira?

Ndeshja kundër Italisë ishte më e vështira, sepse shënuam shumë shpejt dhe më pas u mbyllëm mbrapa. Ishte sikur humbëm veten deri në fund të pjesës së parë derisa e gjetëm sërish në të dytën. Nuk e preka shumë topin në pjesën e parë dhe po thoja pse të mos luajmë tani? Megjithatë, ne humbëm kështu që ishte ndeshja më e vështirë.

Ku do të dëshironit të luanit?

Ekipi im i preferuar është Barcelona, ​​nëse do të luaj ndonjëherë do të ishte një ëndërr e realizuar. Mendoj se La Liga më përshtatet më shumë si ligë, por nuk i bën keq asnjë lojtari të konkurrojë as në Itali, as në Gjermani.

A ka pasur ndonjë këshillë që ju ka dhënë Sylvinho para ndeshjeve?

Ajo që na thoshte është të dilnim dhe ta shijonim që në minutën e parë pa stres, është një ngjarje që nuk e dimë se kur do të mund ta përjetojmë sërish.

Ju personalisht?

Mendoj se ai e sheh veten tek unë, ka luajtur edhe në pozicionin që luaj unë. Ai donte të më drejtonte që të bëhesha më i mirë çdo ditë, ishte i vetmi trajner që më ndihmoi të zhvillohesha rregullisht. Është një pjesë që shumë futbollistë duhet ta përmirësojnë dhe ai më ka ndihmuar shumë në këtë.

S.DH/Shqiptarja.com

TAG:
• mario mitaj
• Legjionaret
• Kombetarja shqiptare