Interkonjeksioni, tri kompani
serbe përfituan nga bllokimi

Dy kompanitë serbe të energjetikës, "Gen" dhe "Rudnap", janë shpallur fitues të tenderit për furnizim me energji elektrike deri në muajin maj 2013, kur shpërndarja kalon në pronësi të kompanisë private turke "Çalik&Limak" - shkruan e përditshmja kosovare "Zëri".

Sipas saj, Korporata Energjetike e Kosovës, gjatë vitit 2011, tri kompanive serbe të energjetikës, përmes tenderave, u ka dhënë më shumë se 56 milionë euro për import të energjisë. Më 11 janar të vitit 2011, KEK-u ka lidhur kontratë me kompaninë "GENI Beograd & Tirana", me seli në Beograd, për furnizim me energji emergjente për periudhën janar-dhjetor të vitit 2011. Vlera e kësaj kontrate ka qenë 33.248.000 euro.

Po kështu, nga bllokimi që bëri qeveria shqiptare për ndërtimin e linjës së interkonjeksionit më Kosovën, përfituan, veç saj, edhe kompanitë "RUDNA Grup Ad" dhe "EGL".

Gazeta e Prishtinës ka qenë e para në Kosovë që ngriti zërin kundër përfitimeve nga ekonomia e Serbisë prej anulimit të tenderit të linjës 400 kilovolt Tiranë-Prishtinë, duke akuzuar fitime për familjen e kryeministrit Berisha.