TIRANE - Vepra humanitare e Keti Bazhdarit është e njohur në mbarë Shkodrën, por duket se ajo tashmë kërkon të kontribuojë edhe në një fushë tjetër, në politikë. Në një intervistë me drejtuesen e fondacionit “Aleanca Civile drejt Integritetit” ajo ka nuk e ka përjashtuar faktin se është një kandidate e mundshme për postin e Kryetares të Bashkisë Shkodër.

Znj. Bazhdari çfarë do të thotë “Cati Foundation” apo “Aleanca Civile drejt Integritetit” që ju sapo keni hapur?
“Cati” jam unë, dhe me pak fantazi kuptohet që do të thotë Fondacioni i Ketit (qesh). Në fakt, kjo ishte një gjetje e dale nga stafi im që u mor me zgjedhjen e emrit më të përshtatshëm, por aktiviteti i këtij fondacioni në thelb është shumë më i rëndësishëm. Bëhet fjalë për një iniciative të re e ndoshta të vonuar në ndihmë të familjeve në nevojë për një nga zonat me ekstremisht të varfera të Shqipërisë, veriun. Objektivi është organizimi dhe koordinimi i biznesit apo kujtdo që ka mundësi e vullnetin e mirë për t'iu bashkuar kësaj nisme, me qëllim jo dhënien lemoshë disa familjeve në mjerim, por një ndihme vërtet solidale dhe edukimi me vlera europiane për t'ia lehtësuar atyre rrugën e daljes nga varfëria.