"Bota duhet të ndalojë së mashtruari veten: Trump po i nxjerr Shtetet e Bashkuara nga rendi ndërkombëtar i krijuar pas Luftës së Dytë Botërore. Pjesa tjetër e komunitetit global duhet urgjentisht të bashkohet, për ta mbajtur atë gjallë edhe pa Amerikën.” Kësaj akuze, ekonomisti i Universitetit të Kolumbias, Jeffrey Sachs, ish-këshilltar i Sekretarit të Përgjithshëm të OKB-së, Antonio Guterres, i shton një paralajmërim të veçantë drejtuar nesh: “Evropa duhet të marrë vendimin më të rëndësishëm: nëse do të vazhdojë të lypë bekimin e një Shtëpie të Bardhë që e përçmon atë, apo të udhëheqë alternativën.”

Si e gjykoni fjalimin e presidentit?

"Një turp i turpshëm për SHBA-në, plot me gënjeshtra dhe marrëzi. Tregon sa e paqëndrueshme është skena politike amerikane".

Çfarë gënjeshtrash?

"Pothuajse çdo paragraf ishte i mbushur me gënjeshtra, shtrembërime, ekzagjerime ose marrëzi. Përmbante megalomani, vulgaritet, poshtërime ndaj çdo qeverie tjetër. Ishte një përfaqësim autentik i mënyrës se si ai e sheh botën".

Le të vazhdojmë me temat, duke filluar nga ndryshimet klimatike.

"Është një i moshuar krejtësisht i paditur dhe i korruptuar. Nuk di asgjë për klimën dhe sistemet energjetike. Nuk kam asnjë dyshim se financohet nga industria e naftës, por çdo fjalë e shqiptuar ishte e rreme dhe kjo mund të vërtetohet lehtësisht".

Ai tha se emigracioni po na çon në ferr.

"Është i martuar me një emigrante dhe edhe e ëma ka qenë emigrante, si të gjithë ne amerikanët. Mbajti një fjalim nacionalist dhe racist. Çështja e emigracionit dhe kufijve është serioze, por mënyra si e trajton ai është një apel ndaj vulgaritetit, gënjeshtrave dhe poshtërimit të dinjitetit të njerëzve. Kjo është ajo që përjetojmë çdo orë në SHBA, degradimi i plotë i politikës amerikane. Ju duhet të ndaloni së përuluri ndaj imponimeve të tij, ashtu si ka bërë Europa".

Pse e urren kaq shumë Kontinentin e Vjetër?

"I urren të gjithë, mos e merrni si çështje personale. Është manifestim i pasigurisë së tij. Nuk ka miq për Trump, vetëm vasalë që i puthin unazën".

Pas dorëzimit mbi taksat doganore, a mundet Europa të ngrihet sërish?

"Sigurisht. Europa e ka keqkuptuar plotësisht 25 vitet e fundit, duke u bërë një vasale e SHBA-së. Udhëheqës pas udhëheqësi, jeni shqetësuar vetëm për t’i bërë qejfin presidentit amerikan. Tani duhet të përballeni me kolapsin politik të SHBA-së, një krizë keqdashjeje dhe injorance, ku nuk është në interesin tuaj të puthni unazën".

Nuk do ta njohë Palestinën sepse do të ishte një dhuratë për Hamasin.

"SHBA janë bashkëfajtore të gjenocidit. Trump është një kriminel lufte në kuptimin literal, sepse ndihmon vrasjen masive të popullit palestinez. Këtë e ka treguar javën e kaluar Komisioni i të Drejtave të Njeriut i OKB-së".

A do të ketë luftë në Ukrainë?

"Do të mbarojë kur NATO të qartësojë se nuk ka asnjë qëllim apo interes të zgjerohet në Kiev".

Është fundi i rendit ndërkombëtar dhe multilateralizmit?

"Jo, sepse SHBA janë vetëm një nga 193 anëtarët e OKB-së, me 4,1% të popullsisë botërore dhe ndoshta 14% të PBB-së globale. Nuk mund të shkatërrojnë organizimin e 192 vendeve të tjera. SHBA po përjetojnë një krizë të thellë që do të vazhdojë për vite, por kjo nuk duhet t’i pengojë të tjerët të zgjidhin problemet vendimtare të planetit. Shumë gjëra duhet të bëhen pa SHBA-në, ose pavarësisht SHBA-së. Mund të dalin edhe nga OKB, por puna e saj mbetet më thelbësore se kurrë dhe duhet vazhduar edhe pa Uashingtonin".

Pra pjesa tjetër e botës duhet ta kuptojë këtë dhe të përgatitet?

"Saktë, dhe zgjedhja vendimtare i takon Europës. Të tjerët po ecin përpara, ju vazhdoni të vraponi drejt Shtëpisë së Bardhë për të marrë leje për gjithçka. Është patetike, ju duhet të ndryshoni."/La Repubblica