Trafikuan 3.5 ton kokainë me vlerë 27 mln € me Ndraghetën, Italia lëshon masë arrest me burg për 6 shqiptarë, mes tyre Artur Hoxhosmani! Lëviznin me Lamborghini (VIDEO)

ITALI - 6 shqiptarë janë në mesin e 28 personave ndaj të cilëve është lëshuar masë sigurie në operacionin me urdhër të Prokurorisë Publike të Milanos, pas një operacioni kundër një rrjeti të gjerë të trafikut të drogës nga Amerika e Jugut. Për 25 prej tyre është lëshuar masa e arrestit në burg, ndërsa për 3 të tjerë arrest shtëpie. Shqiptarët e përfshirë janë Marjus Aliu, Elvis Aliu, Fatjon Aliu, Ervin Bashmeta, Kujtim Daiu dhe Artur Hoxhosmani, nga Kavaja e Burreli, për të gjithë masa 'arrest në burg'. 

Të përfshirët akuzohen se i përkasin një organizate të lidhur me Ndrangheta-n e Lokridës, klani Barbaro, dhe bashkë me shqiptarët organizuan dhe financuan trafikun ndërkombëtar të drogës. Akuzohen se kanë trafikuar 3.5 ton kokainë, nga të cilat më shumë se 400 kg u sekuestruan në Itali dhe jashtë vendit. Brenda afërsisht dy vitesh, organizata transportoi drogë me vlerë mbi 27 milionë euro. 

Hetimi u krye kryesisht nëpërmjet analizës së bisedave në SkyEcc, dhe zbuloi një trekëndësh kompleks të bashkëpunimit midis kriminelëve nga Kalabria, Lombardia dhe Kampania. Mes personave që janë lëshuar masat e sigurisë, është edhe një kinez, i akuzuar për pastrim parash, i cili lehtësonte pagesat e drogës përmes sistemit informal të transferimit "fei ch'ien" ( i njohur edhe si "paratë fluturuese" për transferimin pa lëvizur fizikisht shuma të mëdha parash).

Elvis, Marjus dhe Fatjon Aliu janë nga Kavaja, ndërsa Artur Hoxhosmani nga Burreli. Mediat italiane flasin edhe për luksin e tyre të shfrenuar, të cilët lëviznin me Lamborghini në Milano e flinin në hotele luksi si Armani Hotel.  Artur Hoxhosmani rezulton i arrestuar në Shqipëri me urdhër të SPAK si i përfshirë në grupin e Plaurent Dervishajt, Erion Alibejt dhe bosit të Cinco-s, Ermir Ndrejaj, të akuzuar për trafikun e 6 ton kokainë me vlerë 411 milionë euro. Ndërsa emri i Marjus Aliut del në ngjarje të ndodhur në korrik të vitit 2019, ku pas një përplasjeje mes dy grupeve kriminale, mbeti i vrarë një kalimtar në rrugë. 

Rrjeti logjistik me bazë në Milano dhe rruga detare 

Hetuesit identifikuan rrjetin kriminal me bazë në Lombardi, por që kishte degë edhe në Gjermani, Holandë, Spanjë, Mbretërinë e Bashkuar, Kolumbi dhe Brazil. Grupi përdorte sisteme mesazhesh të koduara dhe menaxhonte lidhjet me trafikantët dhe ndërmjetësit shqiptarë të drogës. Droga dërgohej me det në portet e Livornos, Roterdamit, Gioia Tauro dhe Le Havre, duke përdorur teknikën e “grabitjes” (ose “gacho eiego”), në të cilën ngarkesat e kokainës fshihen brenda kontejnerëve të destinuar për transport të ligjshëm tregtar. 

Pika fillestare e hetimit ishte telefoni i Franco Barbaros, i konsideruar si pika e mbështetjes së organizatës së bashku me Bruno Trimboli. Mbiemrat e familjes së Barbaros kishin ndikim në zonën e Lokridës dhe aktivitetet e tyre tani janë zhvendosur në Lombardi, ku trafikimi i kokainës gjeneron miliona dollarë fitime për klanet. 

Kërkimet po zhvillohen aktualisht në provincat e Milanos, Pavias, Bergamos, Parmës, Imperias, Komos, Romës, Tarantos dhe Reggio Calabria, me qëllim gjetjen e provave të mëtejshme dhe sekuestrimin e aseteve që i atribuohen organizatës. Operacioni u krye nga Komanda Provinciale e Milanos dhe Shërbimi Qendror për Hetimin e Krimit të Organizuar të Guardia di Finanza me urdhër të Prokurorisë së Milanos, në bashkëpunim me Eurojust dhe Europol. 

Lajm në përditësim... 

Rendit zhvillimet sipas orarit:

Të Fundit Të Parat