Milano - Një 45-vjeçar shqiptar është vrarë me armë zjarri nga një i moshuar italian, 78 vjeç. 

Viktima është identifikuar si Dritan Hakaj, ndërsa autori është Walter Budri, shtetas italian. Ngjarja është shënuar të shtunën e 26 Tetorit, përpara banesës së pensionistit, në rrugën Varese, në Garbagnate Milanese, në veri të Milanos. 

Mediat italiane shkruajnë se viktima kishte edhe një lidhje jashtëmartesore me bashkëshorten e autorit.

Nga hetimet e para Hakaj frekuentonte shtëpinë ku jetonte Budri me gruan e tij, gjithashtu shqiptare. Por në orën 3 të mëngjesit, 26 tetor, 45-vjeçari mbërriti i dehur në banesën e çiftit. Ai sulmoi gruan, përballë djalit të saj 11-vjeçar, të cilin e kishte pasur nga një lidhje e mëparshme. Në shtëpi ishte edhe bashkëshorti i saj, Budri, cili me një pistoletë "Beretta 22", qëllon dy herë në ajër për të trembur ‘të dashurin e gruas’, shkruan Corriere della Sera 

Viktima del nga apartamenti dhe zbret shkallët në tentativë për t'u larguar, ndërkohë i moshuari e ndoqi me ashensor dhe të dy u takuan në katin e parë, ku ka pasur dhe një tjetër përleshje mes të dyve, si dhe një të shtënë tjetër.

 Katër gëzhoja pistolete janë gjetur në vendngjarje nga policia, ndërsa njëra ka goditur 45-vjeçarin në gjoks, por do përcaktohet nga ekspertiza nëse ishte rikoshetë apo e drejtëpërdrejtë.

I moshuari është arrestuar për akuzën e vrasjes me dashje, pasi në dëshminë e parë për policinë tha se e kishte qëlluar pas sherrit me 45-vjeçarin, ndërsa dha një dëshmi tjetër për prokurorët.

Edhe arma e cila mbahej pa leje nga i moshuari në shtëpi, është sekuestruar. Viktima ishte banues në Milano, i papunë, me precedentë në trafikun e drogës, prostitucionit dhe vjedhje.