Ja 16 njerëzit që do të skanojnë
800 prokurorët e gjyqtarët

Ditët e para të janarit shënojnë finalizimin e zbatimit të ligjit të Vetingut, përfshirë vendimet dhe rregulloret në funksion të tij. Komisioni i Pavarur i Kualifikimit, organi kryesor i Vetingut, në datën 3 janar 2018, ka përzgjedhur 16 këshilltarët ligjorë dhe ekonomistë, të cilët do të shqyrtojnë dhe përgatisin dosjet për rreth 800 gjyqtarë dhe prokurorë, për ligjshmërinë e pasurive, kontaktet e papërshtatshme me krimin dhe aftësitë profesionale.

Dosja për cilin subjekt do të kalojë për vendim në duart e katër trupave gjyqësore të Komisionit të Kualifikimit, sipas shortit, ndërsa vendimi përfundimtar, gjithnjë nëse subjekti do ta ankimojë, do të merret nga Kolegji i Apelit. Për pozicionin “Këshilltar ligjor” aplikuan 201 kandidatë, prej të cilëve 57 u skualifikuan për mosplotësim të kritereve formale. Janë intervistuar 144 kandidatë që plotësonin këto kritere.

Komiteti ad hoc, i ngritur posaçërisht për këtë proces, nga 144 kandidatët, ka përzgjedhur si fitues emrat: Anola Xhuli, Arben Jorgaqi, Denata Stoja, Ermir Mema, Fiona Zaçaj, Genard Dylqeshi, Gentian Mete, Iglon Peçi, Insidor Rexhepi, Joana Asimi, Klodjana Theodhosi dhe Lola Prendi. Për pozicionin “këshilltar ekonomik” aplikuan 50 kandidatë, prej të cilëve 13 u skualifikuan për mosplotësim të kritereve formale.

Ndërkaq, janë intervistuar 37 kandidatë, nga të cilët u përzgjodhën 4 fituesit: Bukurije Memisha, Irida Jaho, Mirela Kastrati dhe Saimir Emini. Të dy kategoritë e këshilltarëve përbëjnë atë që duhet njësia e shërbimit ligjor pranë Komisioni të Kualifikimit. Vlerësimi dhe përzgjedhja e kandidatëve për 16 vendet vakante në këtë njësi është kryer nga një komitet ad hoc i krijuar nga Komisioni i Kualifikimit. Pa krijimin e kësaj njësie nuk mund të ketë asnjë rezultat nga procesi i Vetingut.

Detyrat e këshilltarëve
Këshilltari ligjor ka për detyrë që të studiojë dosjen e çdo gjyqtari dhe prokurori si dhe të përgatisë një relacion për çështje. Këshilltarët ligjorë do të asistojnë gjithashtu, jo vetëm në studimin e materialeve të dosjes për shqyrtim, por edhe në praktikën ndërkombëtare sidomos të gjykatave evropiane me qëllim respektimin e të drejtave të njeriut.

Këshilltari ligjor, përveç përgatitjes së relacionit mbi zgjidhjen e çështjes në themel, do të hartojë projektvendimin nën orientimin e relatorit që do të arsyetojë vendimin si dhe të kryejë çdo detyrë tjetër të caktuar nga relatori i çështjes. Këshilltari ekonomik duhet të studiojë dosjen nga pikëpamja financiare/ekonomike dhe të përgatisë një relacioni të çështjes, veçanërisht për vlerësimin e pasurisë së subjektit të rivlerësimit.

Më konkretisht, këshilltarët ekonomikë do të ndihmojnë në studimin e të dhënave ekonomike, ato bankare, sigurimeve shoqërore, si dhe çdo të dhënë tjetër që provon ekzistencën e parave fizike ose tatimore apo mjeteve/instrumenteve të tjera të tregut të parave dhe/ose pagesave të bëra, e veçanërisht për vlerësimin e pasurisë së subjektit të rivlerësimit.

Njësia e Kolegjit të Apelimit
Edhe Kolegji i Apelimit ka një njësi të tillë, por me 7 këshilltarë ligjorë dhe 7 ekonomikë. Njësia e Shërbimit Ligjor e Kolegjit të Apelimit përbën bërthamën ndihmese dhe këshillimore dhe mbështet punën profesionale të gjyqtarëve të Kolegjit.

Njësia ushtron veprimtari këshilluese dhe ndihmese në procesin vendimmarrës duke përfshirë përgatitjen e çështjeve për gjykim, dhënien e opinioneve ligjore dhe atyre me natyre ekonomike dhe çdo detyre tjetër të caktuar nga gjyqtari relator.

Njësia e Shërbimit Ligjor jep mendimin në lidhje me mënyrën se si do të procedohet me gjykimin e çështjes për sa i përket gjykimit në dhomë këshillimi apo në seance gjyqësore, përgatit relacionin mbi zgjidhjen e çështjes në themel, harton projektvendimin nën orientimin e gjyqtarit që do të arsyetoja vendimin si dhe kryen çdo detyrë tjetër të caktuar nga relatori i çështjes.

Të dhënat që do shqyrtojnë këshilltarët ekonomikë 

Deklaratat e pasurive të referuara nga ILDKP. 
Raportin e kontrollit të ILDKP për secilin subjekt bashkë me konstatimin përkatës. 
Të dhëna të tjera mbi pasuritë e paluajtshme të subjektit të rivlerësimit, të regjistruara në
regjistrin e pasurive të paluajtshme, ose të përfituara nga një akt noterial i paregjistruar. 
Llogaritë bankare, të dhënat tatimore, bazat e të dhënave mbi automjetet, të dhënat
për hyrje-daljet në kufi. 
Të dhënat mbi të drejta ose interesa pasurorë të çdo lloji mbi një aset, qoftë ky i
luajtshëm ose i paluajtshëm.
Të dhënat mbi kreditë, çeqet e udhëtimit, çeqet bankare, urdhërpagesat, të gjitha llojet e titujve, mandatpagesat dhe letrat e kreditit, si dhe çdo interes.
Të dhënat mbi marrëdhënie të mundshme biznesi, veprimtari tregtare ose veprimtari të tjera. 
Të dhënat që provojnë ekzistencën e parave fizike ose mjeteve ose instrumenteve të
tjera të tregut të parasë dhe/ose të pagesave, ku përfshihen, por pa u shteruar, çeqet, dëftesat dhe certifikatat e depozitave. 
Të dhënat për  kartat e debitit ose të kreditit, kartat elektronike të pagesave, titujt, si dhe çdo dokument tjetër që vërteton ekzistencën e një detyrimi monetar ose një vlere tjetër të depozituar ose për t’i paguar subjektit një shumë korresponduese në para fizike ose në një formë tjetër.

d.c./shqiptarja.com