Ky komision përbehet nga gjashtë anëtarë, tre nga shumica dhe tre nga opozita parlamentare dhe merr në shqyrtim listat e hartuara nga Avokati i Popullit dhe vlerësimet nga Operacioni Ndërkombëtar i Monitorimit, për të përcaktuar kandidaturat që do ti nënshtrohen kontrollit në dy komisionet e tjera.
Ngritja e Komisionit Ad Hoc te Kuvendit mund të miratohet me shumicë të thjeshtë (pra edhe pa opozita). Ndërkohë maxhoranca dhe opozita duhet të propozojnë anëtarët për përbërjen e këtij Komisioni. Nëse opozita nuk përcakton emrat e përfaqësuesve të tyre në komisionet Ad Hoc, procesi i Vettingut s’mund të nis të zbatohet.
Ndërkaq dy komisionet e tjera, përzgjedhëse, janë të përbëra respektivisht nga 6 dhe 12 anëtarë secili, me pjesëmarrje të barabartë të shumicës dhe pakicës parlamentare.
Komisioni ad hoc me gjashtë anëtarë duhet te përzgjedh anëtarët e Kolegjit të Apelimit duke zgjedhur, me votim të fshehtë elektronik, shtatë gjyqtarë titullarë dhe dy kandidatë zëvendësues.
Komisioni ad hoc me 12 anëtarë përzgjedh 12 anëtarët e komisionit të rivlerësimit, dykandidatët zëvendësues, dy komisionerët publikë dhe dy kandidatët zëvendësues për komisioner publik.
Lista përfundimtare me emrat e komisionerëve, gjyqtarëve të Kolegjit të Apelimit dhe komisionarëve publikë të zgjedhur, bashkë me rezultatet e votimit të prodhuara nga sistemi elektronik, i dërgohen brenda dy ditëve Kryetarit të Kuvendit, i cili menjëherë cakton datën dhe orën e mbledhjes së seancës plenare, si dhe i përcjell të gjithë deputetëve këtë listë.
Pas kësaj, Kuvendi në seancë plenare aprovon ose rrëzon listën e dërguar nga komisionet ad hoc të përzgjedhjes. Lista e dërguar miratohet me 3/5 e votave të të gjithë anëtarëve (84 vota) të Kuvendit brenda 10 ditëve. Ky është momenti i dyte kur mungesa e disa deputete nga maxhoranca, (që aktualisht e ka numrin e nevojshëm) mund të bllokoi procesin e Vettingut.
Në fakt, nëse kjo shumicë nuk arrihet komisionet ad hoc ri kryejnë procesin e përzgjedhjes dhe dërgojnë një listë të dytë brenda 10 ditëve. Në votimin e listës së dytë Kuvendi mund ta rrëzojë listën e propozuar nëse në favor të rrëzimit votojnë 2/3 e të gjithë anëtarëve të tij (94 vota). Në rast, nëse kjo shumicë nuk arrihet kandidatët konsiderohen të zgjedhur.
Në rast se lista rrëzohet nga Kuvendi me 2/3 e votave të të gjithë anëtarëve të tij procedurat përzgjedhjen e anëtarëve të organeve të ri vlerësimit kalimtar rifillojnë që nga fillimi me shpalljen e vendeve vakante nga Presidenti i Republikës.
(d.b/Shqiptarja.com)