PRISHTINË, 2 Tetor /ATSH-B.Jashari/.-Presidentja e Kosovës, Atifete Jahjaga, në 24-vjetorin e Ditës së Bashkimit të Gjermanisë, theksoi se, "dy vendet tona sot gëzojnë një partneritet të qëndrueshëm dhe një miqësi të fortë".
Ajo falënderoi ambasadoren gjermane në Kosovë, Angelika Viets, për ftesën në festimet e përvjetorit të bashkimit të Gjermanisë, ku edhe reflektohet mbi ngjarjen e cila nisi një epokë të re të bashkimit të njerëzve përtej kufijve që i mbanin ata vetëm fizikisht të ndarë."Pas dy dekadash e gjysmë, Gjermania e bashkuar është një dëshmi e gjallë që bashkimi na bën më të fuqishëm. Një ekonomi e zhvilluar, një demokraci prosperuese, një promovuese e integrimit evropian dhe euroatlantik ", u shpreh Jahjaga.
Presidentja e Republikës theksoi se, Gjermania është inspirim për qytetarët e Kosovës.
"Shumë qytetarë tanë, në periudha të ndryshme të bërjes tonë shtet, janë mirëpritur nga ky shtet mik, ndihmën e pakursyer të së cilit ne gjithmonë e kemi gëzuar. Të gjithë ne jemi falënderues për rolin udhëheqës që Gjermania ka pasur për ta ndalur luftën në Kosovë dhe për ta ndërtuar paqen, për besimin dhe përkrahjen e tyre për të ndërtuar vizionin tonë për një Kosovë të lirë dhe të pavarur, në paqe me fqinjët e saj", tha Jahjaga.Kosova, vijoi ajo, është shumë krenare dhe mbetet e dedikuar ndaj këtij partneriteti me Gjermaninë dhe popullin e saj, një miqësie të qëndrueshme të bazuar në vlerat tona të përbashkëta të demokracisë dhe sundimit të ligjit.
"Dy vendet tona sot gëzojnë një partneritet të qëndrueshëm dhe një miqësi të fortë, të lidhur nga besimi i përbashkët në vlerat e lirisë, demokracisë, dhe sundimit të ligjit", theksoi Jahjaga.
Kosova, shtoi ajo, po vazhdon të ndërtojë demokracinë e saj dhe të gjithë po e zbulojmë se demokracia funksionon vetëm atëherë kur i jepet kohë që të maturojë dhe të japë rezultate, sepse demokracia është gjithmonë në zhvillim e sipër.
"Në 100 ditët e fundit, si institucione dhe qytetarë të Kosovës jemi përballur me sfidën e një demokracie të re parlamentare, me një Kushtetutë të patestuar. Me qetësinë dhe maturinë e një demokracie të vjetër i kemi kaluar disa procese të rëndësishme, duke i'u dhënë mundësi institucioneve tona të mandatuara që të gjejnë zgjidhje në respektim të sundimit të rendit dhe ligjit", u shpreh Presidentja kosovare.
Dhe pavarësisht sa na ka testuar ky proces, vijoi Jahjaga, unë jam e bindur se nga ai do të dalim më të fuqishëm dhe demokracia jonë do të jetë më e konsoliduar, sepse nuk jemi duke vendosur vetëm për sot, por edhe për të ardhmen tonë.
"Dua t'ju siguroj se rruga jonë është e pakthyeshme. Ne do të përparojmë dhe ne do të korrim sukses", tha Presidentja e Kosovës duke uruar Ditën e Bashkimit të Gjermanisë./m.m/