ATHINË, Greqi - Panathinaikos ka emëruar në stol ish-trajnerin e Liverpoolit dhe Real Madridit, Rafael Benitez, njoftoi klubi grek të premten, me spanjollin 65-vjeçar që zëvendëson Christos Kontis, i cili u shkarkua pas humbjes 3-1 në Europa League të enjten ndaj Feyenoord.

Mediat greke raportojnë se Benitez ka nënshkruar një kontratë dy vjeçare me klubin me seli në Athinë. Benitez ishte së fundmi pjesë e Celta Vigos në La Liga, ku u shkarkua në mars të vitit të kaluar pas tetë muajsh në krye. Marrëveshja e re përfshin një opsion për ta zgjatur atë për një vit shtesë dhe vlen rreth 4 milionë euro në sezon, pagë që mediat lokale raportuan se ishte paga më e lartë e paguar ndonjëherë një trajneri në ligën e parë greke.

Benitez udhëhoqi Liverpoolin drejt titullit të Ligës së Kampionëve në vitin 2005 dhe Chelsean drejt kurorës së Ligës së Evropës në vitin 2013, përveç sukseseve vendase dhe evropiane me Valencian, Interin dhe Napolin. Ai ka drejtuar edhe Real Madridin, Newcastle dhe Everton.

Spanjolli do të ketë për detyrë të 'ringjallë' Panathinaikosin, pasi 20 herë kampionët e Greqisë renditen në vendin e shtatë në Superligën greke dhe kanë bërë një nisje të paqëndrueshme të sezonit në Europa League, duke pësuar dy humbje radhazi pas një fitoreje në ndeshjen debutuese.