PD kërkon shkarkimin e Begajt: 7 shkelje, dekretoi zgjedhjet në Tiranë e Diellën! Presidenti i punësuar në klinikë private, ia ndalon Kushtetuta (VIDEO)

Shtatë shkelje të pretenduara të Kushtetutës numëroi Gazment Bardhi, teksa njoftoi depozitimin e një kërkesë për shkarkimin e Presidentit të Republikës Bajram Begaj. Për kreun e grupit parlamentar të PD shkelja e parë e rëndë lidhet me dekretimin e zgjedhjeve të pjesshme për Bashkinë Tiranë. 

“Presidenti ka konsumuar 7 shkelje Kushtetuese të rënda. Konkretisht, shkelje të rënda dhe të përsëritura të Kushtetutës nga ana e Presidentit, janë dekretimi antikushtetues i zgjedhjeve për Bashkinë e Tiranës. Ka ndërhyrë në mënyrë brutale tek kompetencat e pushtetit vendor. Në 35 vite demokraci, është zhveshur gjykata Kushtetuese. Presidenti i Republikës Bajram Begaj në këtë shkelje të evidentuar nga ne, ka kryer shkelje të Kushtetës. Ai ka futur në ngërç kushtetues, zgjedhjet e pjesshme për Bashkinë e Tiranës, duke shkaktuar konfuzion të zgjedhësit. Ka marrë kompetencat e gjyqësorit, duke përdorur juridiksionin”, tha Bardhi.

Kërkesa e Presidentit në Kushtetuese për sqarimin e mandatit të anëtarëve të kësaj gjykate, dekretimi i Diellës ministre, dekretimi i ligjit për komisionet hetimore, apo edhe akuzat se lejoi përfshirje të trupës diplomatike dhe kabinetit të tij në zgjedhje për Partinë Demokratike janë arsye që Begaj të mos jetë më kreu i shtetit.

“Ka dekretuar në mënyrë antikushtetuese ligjin për komisionet hetimore, duke injoruar fuqinë detyruese të disa vendime të Kushtetueses.Dekretimi i Diellës në kundërshtim me ligjin. Begaj ka kryer shkelje të rëndë se ka cenuar parimin e ndarjes dhe balancimit të pushtetit, ka krijuar një strukturë të re ministrore dhe i ka caktuar kryeministrit përgjegjësi të reja përtej asaj që lejonte Kushtetuta.

Ka lejuar përfshirjen e trupit diplomatik të Shqipërisë të akredituar në disa shtet, në aktivitete politike zgjedhor të PS, duke mundësuar pabarazinë e garës zgjedhore të 11 majit dhe duke lejuar shkrirjen e shtetit me partinë në pushtet. Begaj ka kryer shkelje të rëndë të Kushtetutës, ka cenuar barazinë e palëve në zgjedhje. Dështoi të ruante rolin neutral të tij mbi palët.

Ka ndërhyrë në mënyrë antikushtetuese përmes kabinetet të tij në zgjedhje. Ka lejuar angazhimin e kabinetit në procesin e administrimit të zgjedhjeve në faza të mëhershme nga faza ku futet në lojë institucioni i republikës, duke konsumuar ndërhyrjeje flagrante antikushtetuese”, theksoi Bardhi.

Begaj akuzohet nga opozita se ka humbur fuqinë apo të drejtën e qeverisjes së pavarur duke u vënë në dispozicion të urdhrave të kryeministrit Edi Rama.

"Po ashtu ne jemi të bindur se Begaj nuk mund të vazhdojë më të jetë de juro kryetar shteti dhe përfaqësues i popullit që në fakt de facto e ka humbur prej kohësh", tha Bardhi.

Një tjetër akuzë e lëshuar nga PD përfshin dhe të birin e presidentit Begaj. Gazment Bardhi tha se djali i presidentit 23 vjeç, i cili aktualisht ndodhet jashtë shteti me studime dhe gjithashtu i punësuar atje, rezulton dhe në Shqipëri i punësuar faktikisht në një kompani private sigurimesh nga ku merr një rrogë mujore të barabartë me drejtorin e përgjithshëm të kompanisë. Kjo kompani thotë Bardhi, përfiton tendera nga presidenca e merr mijëra euro në vit nga institucioni i shtetit, ndërsa theksoi se do ti drejtohen SPAK. 

“I jep tenderët dhe kompania punëson një 23 vjeçar që s’ka lidhje me fushën e sigurimeve. Bëhet fjalë për një vlerë mijëra euro që djali i presidenti përfiton çdo vit nga kjo kompani që nga ana tjetër merr mijëra euro çdo vit nga institucioni i presidentit të republikës. Këtu nuk jemi për krimin e rëndë që ka kryer presidenti, do ta trajtojmë me një kallëzim të detajuar që do i dërgojmë SPAK”, tha Bardhi.

Begaj sipas kreut të grupit demokrat meriton të shkarkohet edhe pse sipas tij denigroi institucionin, pasi duke qenë në detyrë ka marrë rroga si konsulent në një klinikë private dhe si pedagog në Akademinë Ushtarake. Bardhi theksoi se dypunësimin ia ndalon Kushtetuta.

“Ditën bën presidentin e Republikës, pasdite paguhet nga rrjeti i klinikave private Acibadem siç deklaron vetë të ardhurat çdo vit. Ky është niveli i presidentit të Republikës dhe ne ndjejmë keqardhje që një individ nuk pëmbush asnjë standart etik, integriteti e profesionalizmi sot është kreu i Shtetit.

Deklaron dhe e si pedagog, shkon jep dhe mësim se është shumë i ditur. Jep mësim tek Akademia e Forcave të Armatosura. Ku ka lek, do të gjeni Bajram Begajn”, tha Bardhi.

Shkarkimi i Presidentit të Republikës, sipas nenit 90 të Kushtetutës së vendit, bëhet vetëm për shkelje të rënda të ligjit themelor dhe për kryerjen  e  një  krimi të  rëndë.  Propozimi  për  shkarkimin  e  Presidentit  bëhet nga të paktën 35 deputetë dhe duhet miratuar në seancë plenarë nga të paktën 94 ligjvënës. Por shkarkimi eventual nga Kuvendi në të gjitha rastet i  dërgohet  Gjykatës  Kushtetuese, e cila është ajo që vërteton  fajësinë dhe deklaron shkarkimin e Presidentit nga detyra

K.B/r.k./Shqiptarja.com

TAG:
• PD
• Bajram Begaj
• gazment bardhi
• Presidenca
• kuvend