Kabineti i ri, Logu: Makijazh i Ramës! Andoni: Tregon krizë besimi mes ekskluzivit të socialistëve

Kuvendi votëbesoi ditën e sotme 5 nga 7 ministrat e rinj të kabinetit qeveritar të propozuar nga Kryeministri Rama. Analisti Ben Andoni ka komentuar në Report Tv kabinetin e ri, ndërsa vlerësoi figurën e Arbi Maznikut, duke thënë se ka bërë shumë për Partinë Socialiste në terren. Në emisionin ‘Studio Live’ me gazetarin Arbër Hitaj, Andoni tha se këto ndryshime tregojnë që ka një lloj krize besimi në mes të ekskluzivit të socialistëve, përveç goditjeve të SPAK.

“Nuk më thotë gjë asnjë lloj ndryshimi që bën Rama për shkak të diferencës të madhe që po mban me ekzekutivin, por edhe mënyrën si është trajtuar në asamble. Më duket interesante ardhja e Maznikut që është truri i PS për zgjedhjet. Vlerësoj pjesën e teknicienëve, por na presin ditë akoma. Zgjedhjet janë shumë larg për të parë këto lloj zhvillimesh, por të modifikosh qeverinë kaq shumë tregon që ka një lloj krize besimi në mes të ekskluzivit të socialistëve përveç goditjeve të drejtësisë”, tha Andoni.

Ndërkohë, anëtari i Këshillit Kombëtar në PD, Besart Logu i cilësoi ndryshimet si një makijazh të Edi Ramës.

“Ndryshime që përveçse ia dikton koha, janë edhe ndryshime që diktohen edhe nga zhvillimet në spak. Emrat e të larguar, janë të përfolur, Xhaçka, Denaj, Manastirliu, janë zyrtarë që e kanë parë derën e SPAK, ndryshe nga Spiropali edhe pse është përfolur për korrupsion. Emra që mbartin një ngarkesë, akuzë sa politike, por deri diku edhe juridike penale. Ministrat teknikë vendosen atëherë. Rama e ka thjesht makijazh këtë. Ndryshimet u bënë edhe nga një farë imponimi. Të tre figurat qendrore, Basha erdhi pas zgjedhjeve të 29 korrikut dhe kuvendit të 2 shtator, me një kapitull të ri në PD, Rama e kishte të nevojshme një sezon të ri. Berisha rishpiku veten përmes gaz bardhit”, tha Logu.

SI.E./KT/Shqiptarja.com

TAG:
• studio live
• besart logu
• Ben Andoni
• asambleja e PS