Psikologët thonë se të mbajturit të paktën një kafshë shtëpiake ka shumë benefite për humanët, përveç kënaqësisë që u falin atyre, ulja e nivelit të stresit është një prej tyre. Mund të tingëllojë surprizuese, por është vërtetuar shkencërisht se prania e një qeni bën të mundur uljen e sasisë së homonit përgjegjës për stresin. “Kur kam afër Çilën edhe nëse jam e mërzitur, apo e lodhur nga puna, duket sikur ajo më heq gjithë mërzinë!
Është e pabesueshme, por ajo nuk më lë të jem keq emocionalisht!- Shprehet Bela, një vajzë që prej 7 vitesh tashmë jeton sëbashku me qenushen e saj Çila. Ajo pohon se fillimisht e ka blerë Çilën për t’u dukur “in” si gjithë shoqet e saj, por sot nuk jeton dot pa të. “Mezi pres të kthehëm nga puna e të shoh Çilën duke më pritur tek dera, kjo është vërtet lumturi”,- vazhdon të flasë me shumë entuziazëm e reja. Një tjetër vlerë e vërtetuar e kafshëve të shoqërimit është edhe fakti se ndikojnë pozitivisht në rritjen e fëmijëve, duke i bërë ata më të dashur e më socialë. Por, gjithë kënaqësia e dashuria që na falin meriton minimalisht kujdes shëndetësor nga ana jonë.
A nuk ka rëndësi të shpenzohet pak kohë për të përzgjedhur veterinerin që do të kujdeset për shëndetin e tyre? Është mirë që kur zgjidhni veterinerin e kafshës suaj të përdorni të njëjtin kujdes dhe kritere me ato që do të përdornit për të zgjedhur mjekun ose dentistin tuaj. Vendondodhja, orari i punës, opsionet e pagesave dhe shërbimet e ndryshme të ofruara janë faktorë të rëndësishëm që duhen marrë në konsideratë.
Pronarët, e veçanërisht ata që personalisht kujdesen për shëndetin e kafshës janë në gjendje të dallojnë qoftë edhe shenjën më të vogël se diçka po shkon keq me kafshën e tyre, gjë që vihet re në sasinë e ushqimit që hanë, në mungesën e dëshirës për të luajtur apo në qëndrimin e tyre. Kështu nëse vini re diçka të tillë: Kujdes!
Është koha ta dërgoni kafshën tuaj tek veterineri! Tani një lajm të mirë për të gjithë ata që kanë rezervuar pushimet e tyre, por ende nuk kanë vendosur se ku do të lënë qenin, macen, breshkën apo peshkun e tyre. Ekzistojnë shërbime hotelerie për to, që do të merren me kujdesin e tyre gjatë kohës që ju shijoni pushimet. Kur të ktheheni “pjesëtari tjetër” i familjes do të jetë duke ju pritur.
Shkrimi u botua në Shqiptarja.com (print) në 11 Qershor 2015
Redaksia Online
(d.a/shqiptarja.com)