Kallëzohet penalisht shefi i Komisariatit të Rinasit, avokatët e gazetarit turk që u dëbua nga Shqipëria: Nuk i lejuan asnjë kontakt me ne

Arben Llangozi, avokati i gazetarit turk, Ahmet Emre Olur, i cili u dëbua nga vendi ynë disa ditë më parë, kanë kallëzuar penalisht Shefin e komisariatit të policisë Kufitare të Rinasit, Përparim Demën për shpërdorim detyre. Avokate pretendon se Përparim Dema është vënë në dijeni që në fillim se Olur i rrezikohet jeta nëse kthehej në Turqi.

“Shefi i komisariatit në policinë Kufitare Rinas na ka privuar të takojmë klientin që ne përfaqësojmë, dhe ky fakt bije ndesh me ligjin 85/2018 ‘Për profesionin e Avokatit në Republikën e Shqipërisë’, por nga ana tjetër ky shef policie në mënyrë kriminale ka privuar të drejtën e ushtrimit të profesionit të avokatit, fakt që është një e drejtë themelore e njeriut, e pa respektuar nga punonjësi i policisë Përparim Dema... Kemi njoftuar shefin Përparim Dema në numrin e tij të telefonit 06******** ku i kemi paraqitur kërkesën për azil të shtetasit Emre Olur, por shefi nuk ka kthyer përgjigje dhe nuk e ka trajtuar këtë kërkesë në shkelje flagrante me ligjin Nr. 10/2021 “Për Azilin në Republikën e Shqipërisë” dhe si përfundim e ka dërguar shtetasin Turk në Turqi pa shqyrtuar më parë kërkesën e tij për Azil.” – thuhet në kallëzim.

Ahmet Emre Olur, gazetari turk, që kërkoi azil politik në Shqipëri, u depërtua një ditë më parë drejt Turqisë nga aeroporti i Rinasit. Autoritetet shqiptare refuzuan azilin politik të shtetasit turk duke vendosur depërtimin e tij drejt Turqisë. Gazetari turk u ndalua dje në Rinas dhe kërkoi azil politik në Shqipëri, pasi pretendonte se në vendin e tij i rrezikohet jeta. Kur ka hyrë në Shqipëri, Ahmet Emre Olur është ndaluar në Rinas ku është marrë një vendim për ta dëbuar nga Shqipëria në Turqi. 

Pavarësisht se avokati i tij thotë se ishte gazetar, 26-vjeçari në mediat turke cilësohet si "konsulenti i shtypit” i kreut të krimit të organizuar, Sedat Peker. Olur kishte një kanal në Youtube ku vitin e kaluar publikonte fakte që vërtetonin lidhjen mes politikës dhe mafias. Me arratisjen jashtë shtetit të Sedat Pekerit, Olur doli sërish në pah, pasi u kuptua se disa nga përgjigjet në rrjetet sociale në emër të kreut të organizuar vinin pikërisht nga ai.

Mediat turke shkruajnë gjithashtu se Emre Olur, u dërgua në Aeroportin e Stambollit me fluturimin e planifikuar të Air Albania me bazë në Shqipëri. Olur, i cili u nxor nga avioni në aeroport nga ekipet e Departamentit të Policisë së Stambollit kundër Krimit të Organizuar, më pas u dërgua në Departamentin e Policisë në aeroport.

Pas procedurave të tij atje, Olur u nis nga aeroporti në orën 10:30 për t'u dërguar në Drejtorinë e Sigurisë Provinciale të Stambollit. Në deklaratën e bërë për Emre Olur nga Drejtoria e Përgjithshme e Sigurisë ai akuzohet për  “Kanosje”, “Lavdërim i krimit dhe kriminelit”, “Fyerje”, “Anëtar i një organizate të krijuar për të kryer një krim”, “Plagosje e thjeshtë” “Fyerje me mesazh zanor, me shkrim ose me video”.

M.Q./Shqiptarja.com

TAG:
• Ahmet Emre Olur
• perparim dema
• turqi
• azilkerkuesit