Kancelari i Gjermanisë Friedrich Merz

Gjatë diskutimeve në Konferencën e Sigurisë në Mynih, Kancelari i Gjermanisë Friedrich Merz u ndal te zgjerimi i Bashkimit Europian, pasi presidenti i Malit të Zi ngriti pyetjen mbi ecurinë e procesit.

Merz pranoi se po ndihet “gjithnjë e më i parehatshëm” me paaftësinë e BE-së për të bërë përparim domethënës në procesin e anëtarësimit.

“Duhet të hapim një strategji të re se si t’i afrojmë këto vende me Bashkimin Europian. Nuk dua t’ju humbas,” tha ai.

Ai pranoi se ekziston “një elefant në dhomë”, pasi procesi kërkon unanimitet dhe Hungaria vazhdon të bllokojë hapa të mëtejshëm.

“Duhet ta kapërcejmë këtë,” u shpreh Merz.

Merz la të kuptohet se zgjedhjet parlamentare në Hungari, që pritet të mbahen në prill, mund të ndikojnë në ecurinë e procesit. Sipas tij, pas këtyre zgjedhjeve mund të hapen kapituj të rinj negociatash dhe vendet kandidate të afrohen më shumë me BE-në.


Lajmi kryesor:

Konferenca e Sigurisë në Mynih nis mes tensioneve SHBA-Europë, kancelari gjerman: Rendi botëror që njihnim nuk ekziston më