GRAMSH- Një ditë më parë autoritetet e IKMT prishën ndërtimin për Hecin e Holtës, por banorët e zonës thonë se rreth 1 km më tej po ndërtohet një HEC i dytë. Ata kanë denoncuar ndërtimin që po kryhet në rrjedhën e lumit.
Sipas tyre, ujërat nuk do të jenë në sipërfaqe por ato do të grumbullohen të gjitha e do të kalojnë në tuba. Për banorët e zonës kjo është një tjetër masakër pasi ujërat e lumit që përdoren prej tyre për tokat bujqësore nuk do të jenë në sipërfaqen e shtratit.
Ditën e djeshme ministria e Infrastrukturës dhe Energjisë së bashku me autoritetet e tjera, ka bërë të mundur shembjen e digës së betonit e ndërtuar në afërsi të Kanionit. Leja për ndërtimin e Këtij HEC-i ishte anuluar në janar të 2019, por vetëm ditën e djeshme është marrë vendimi për prishjen e kësaj dige betoni që ishte ndërtuar në dalje të kanionit të Holtës.
Në lidhje me këtë vendim ka reaguar edhe kryetari i ri i bashkisë Klodian Taçe i cili ka thënë se së bashku me interesin e qytetarëve, ministria vendosi që të shembë digën. Më pas Taçe ka thënë se ka ikur koha kur qyteti i Gramshit përbuzej dhe pasuritë e shumta natyrore përdoreshin për përfitime personale të një grupi të caktuar personash.
Lidhur me këtë fakt reagoi edhe kryeministri Edi Rama i cili tha se bukuria e magjishme e Holtës nuk do të preket.
