KORÇË - Ndërsa disa agjenci turistike po hetohen me dyshimin se mashtrojnë qytetarët për azil ekonomik në vendet Perëndimore, policia ka kryer arrestimin e parë të një personi që tentoi të kalonte në kufi 4 pjesëtarë të komunitetit rom me destinación Gjermaninë.
 
Policia arrestoi në flagrancë 37-vjeçarin Altin Rustemi banues në Korçë, pasi në pikën kufitare të Kapshticës tentoi të kalonte me makinën e tij 4 qytetarë të komunitetit rom. Ata kanë dëshmuar para efektivëve se ishin nisur për në Gjermani me qëllimin për të përfituar azil ekonomik.
 
Gjatë kontrollit të tyre, policia gjeti bileta dhe dokumente të tjera të nevojshme për udhëtimin drejt Gjermanisë.
 
Ky është arrestimi i parë i një personi që organizon udhëtime me qytetarë të cilët janë mashtruar se do të mund të përfitojnë azil ekonomik në Gjermani. Pas “eksodit” që ka prekur vendin tonë me largimin e qindra të rinjve dhe familjarëve drejt vendeve perëndimore policia shtoi kontrollet në kufi për ta frenuar këtë fenomen.
 
“Eksodi” është kthyer edhe në objekt akuzash dhe kundërakuzash mes mazhorancës dhe opozitës. Kryeministri Edi Rama është shprehur më herët se shqiptarët e kanë keqkuptuar nevojën e Gjermanisë për 45 mijë emigrantë të cilët mund të ofrojnë kontributin e tyre në fusha specifike për të cilat ky shtet kërkon punëtorë. Kreu i qeverisë tha se struktura kriminale kanë hyrë në veprim duke stimuluar largimin e shqiptarëve përmes mashtrimit. Ndërsa ish-kryeministri Berisha e quajti këtë situatë kapitullim të shtetit.

Redaksia Online
(Gre.M/Shqiptarja.com)