'Kemi marrë raporte për protestën', ambasada e SHBA thirrje qytetarëve të saj: Shmangni tubimet e mëdha, demonstratat mund të përhapen

TIRANË- Ambasada amerikane në Tiranë reagon për protestën e zhvilluar mbrëmjen e kaluar në Tiranë kundër vrasjes së 25-vjeçarit Klodjan Rasha nga policia. Me anë të një deklarate në faqen zyrtare, Ambasada Amerikane u bën thirrje qytetarëve të saj që të shmangin zonat ku u zhvillua protesta e ditës së djeshme, për shkak se demonstratat mund të përhapen. Ato bëjnë me dije se kanë marrë raporte lidhur me atë çka ndodhi gjatë mbrëmjes se djeshme ku është hedhur gaz lot sjellës, janë lënduar protestues, e për pasojë u bën thirrje që të shmangin tubime të tilla.

“Ambasada ka marrë raporte për protestën që ndodhi përpara zyrave qeveritare në Bulevardin “Dëshmorët e Kombit”, në Tiranë. Raportet tregojnë se disa protestues kanë hedhur objekte në drejtim të policisë dhe disa efektivë u plagosën. Efektivët e policisë kanë përdorur gaz lotsjellës për të kontrolluar turmën. Qytetarët amerikanë duhet të shmangin tubimet e mëdha, pasi demonstrata të ngjashme mund të përhapen në zona të tjera. Personeli i ambasadës amerikane dhe anëtarët e familjes janë këshilluar të shmangin të gjithë vendet, ku demonstratat janë të vazhdueshme”, thuhet në njoftimin e ambasadës.

Qindra qytetarë pasditen e djeshme u mblodhën në protestë "për Klodjanin", për të kërkuar drejtësi për vrasjen e tij nga efektivi i policisë 2 ditë më parë. Protesta e cila zgjati rreth 4 orë, degjeneroi në dhunë nga ana e protestuesve ku thyen xhamat te ministria e Brendshme,  iu vu flaka pemës së Vitit të Ri te Kryeministria dhe sheshi, u qëlluan me gurë policë, e ku për pasojë 16 prej tyre mbetën të lënduar. Njëri prej tyre është në gjendje më të rënduar, pasi ka xham në njërin sy dhe mund ta humbasë atë. Polici i moshës 36-vjeç i është nënshtruar ndërhyrjeve kirurgjikale. Ndërkohë, janë arrestuar 3 organizatorët në Tiranë, teksa janë shpallur në kërkim Stresi dhe 7 protestues të tjerë.

Njoftimi i Ambasadës Amerikane në Tiranë në anglisht

B.K./Shqiptarja.com

TAG:
• Tirane
• ambasada amerikane
• Protesta
• vrasja e klodjan rashes
• Klodjan Rasha